Nëntëmbëdhjetë fëmijë të vegjël dhe dy të rritur kanë vdekur nga të shtënat në një shkollë fillore në Teksasin jugor.
Personi i armatosur hapi zjarr në shkollën fillore Robb, ku mësojnë fëmijët e moshës 7 deri në 10 vjeç, në qytetin e Uvalde. Autori u vra më pas nga forcat e rendit.
I dyshuari 18-vjeç, kishte një pistoletë, një pushkë gjysmë automatike AR-15 dhe karikatorë me kapacitet të lartë, thonë hetuesit. Adoleshenti dyshohet se ka qëlluar gjyshen e tij para sulmit në shkollë.
Mediat lokale raportojnë se ai mund të ketë qenë një nxënës i shkollës së mesme në zonë.
Shefi i Policisë së Distriktit të Pavarur të Shkollës Uvalde, Pete Arredondo tha se të shtënat filluan në orën 11:32 me orën lokale të së martës dhe se hetuesit besojnë se sulmuesi “veproi i vetëm gjatë këtij krimi të tmerrshëm”.
Guvernatori i Teksasit Greg Abbott tha se sulmuesi, të cilin ai e quajti si Salvador Ramos, braktisi një automjet përpara se të hynte në shkollë për të hapur zjarr.
Një nga të rriturit e vrarë ishte një mësuese, e cila është identifikuar në mediat amerikane si Eva Mireles. Faqja e shkollës ku ajo punonte, tha se ajo ka një vajzë në kolegj dhe i pëlqente vrapimi dhe ecja.
Në një fjalim nga Shtëpia e Bardhë, Presidenti i SHBA Joe Biden bëri thirrje për kontrollin e armëve.
“Sa shumë fëmijë të vegjël që panë atë që ndodhi, panë miqtë e tyre të vdesin, sikur ishin në një fushë beteje, për hir të Zotit,” tha ai. “Ata do të jetojnë me ato imazhe në pjesën tjetër të jetës së tyre.”
Ai urdhëroi që flamujt në Shtëpinë e Bardhë dhe ndërtesat e tjera federale të SHBA-së të valonin në gjysmështizë për nder të viktimave në Uvalde.
Të shtënat në shkolla janë bërë emergjenca të përsëritura në SHBA, me 26 ngjarje të regjistruara vitin e kaluar, sipas EdWeek, një botim për arsimin.
Të shtënat e vitit 2012, në shkollën fillore Sandy Hook në Konektikat ishin sulmi më vdekjeprurës. Njëzet nga 26 viktimat ishin midis moshës pesë dhe gjashtë vjeç.
Duke folur në senatin e SHBA-së në Uashington DC të martën, senatori demokrat i Konektikatit, Chris Murphy iu lut kolegëve që të miratonin legjislacionin për kontrollin e armëve.
“Këta fëmijë nuk ishin të pafat,” tha ai. “Kjo ndodh vetëm në këtë vend. Askund tjetër, askund tjetër fëmijët e vegjël nuk shkojnë në shkollë duke menduar se mund të pushkatohen atë ditë.”
Por senatori i Teksasit, Ted Cruz hodhi poshtë thirrjet për kontrollin e armëve. Ai tha se kufizimi i të drejtave të “qytetarëve që i binden ligjit… nuk funksionon. Nuk është efektiv. Nuk parandalon krimin.”
Armët tejkaluan aksidentet me makinë për t’u bërë shkaku kryesor i vdekjes për fëmijët dhe adoleshentët amerikanë në vitin 2020, sipas të dhënave nga Qendra për Kontrollin dhe Parandalimin e Sëmundjeve (CDC) muajin e kaluar./Marrë me shkurtime nga BBC- Liberale.al
