Sulmi mbi Ukrainën, shefi i NATO-s në konferencë urgjente: Një pushtim i qëllimshëm, gjakftohtë

Sekretari i Përgjishëm i NATO-s Stoltenberg ka dalë me një konferencë urgjente, ku ka folur për qëndrimin që do mbahet në lidhje me pushtimin rus në Ukrainë.

“Kemi rritur prezencën tonë në zonën lindore. Retorika kërcënuese e Rusisë një normalitet i ri”, tha shefi i NATO-s.

Shefi i NATO shtoi gjithashtu se aleanca do të dërgojë trupa shtesë në kufijtë e saj lindorë, por jo në Ukrainë.

“Në ditët në vijim do të dërgojmë trupa shtesë në lindje, ku tashmë ndodhen mijëra ushtarë. Pas ndërhyrjes ushtarake ruse kemi aktivizuar planin e mbrojtjes së NATO që iu jep më shumë autoritet komandantëve në terren. Për momentin nuk ka trupa të NATO në Ukrainë dhe nuk kemi asnjë plan apo qëllim për të dërguar ushtarë atje”, shtoi Stoltenberg.

Jens Stoltenberg thotë se Rusia ka nisur sulme ajrore dhe raketore, me forcat tokësore dhe forcat speciale qe po perparojne nga shumë drejtime duke goditur infrastrukturën ushtarake të Ukrainës dhe qendrat kryesore urbane.

“Ky është një pushtim i qëllimshëm, gjakftohtë dhe i planifikuar prej kohësh,” thotë ai.

“Liderët e Rusisë do të mbajnë përgjegjësi të plotë për veprimet e tyre të pamatura dhe jetët e humbura”, thekson Jens Stoltenberg.