La liga në Spanjë ka dhuruar emocione të mëdha, teksa Barcelona ka rikthyer besimin dhe pas disa fitoreve radhazi e gjen veten në vendin e dytë, edhe pse 8 pikë larg kryesuesve të Atletiko Madrid. Por më e rëndësishmja, duket se është forma e mirë e skuadrës, dhe një super Mesi që realizoi një gol spektakolar nga jashtë zonës, me një të majtë drithëruese në trekëndësh. Barcelona shkon me optimizëm drejt të martës, ku do të ndeshet me PSG në raundin e parë të 16-tëshes së Champions League.
Sot në drekë, Real Madrid ka një përballje jo shumë të lehtë me valencian, dhe nëse fiton tejkalon sërish Barcelonën në renditje, dhe shkon në vendin e dytë.
Në Itali, ndalimi i Juventusit prej Napolit i ka dhënë edhe më shumë shpresë Interit, që nëse fiton sonte me Lacion, ngjitet në krye të tabelës, duke qënë se Milani humbi mbrëmë në fushën e Spezia-s.
Roma e ka nisur mirë këtë të dielë duke fituar lehtësisht me Udinezen, me çka ka konsoliduar kështu vendin e tretë në renditje.
Në Premier League në Angli kanë ndodhur befasitë e mëdha. Humbja e 5 për Liverpulin që përfundimisht është në krizë të thellë. Edhe pse ishte në avantazh ndaj Leicester, për 6 minuta pësoi 3 gola, duke nxjerrë edhe një herë në pah vështirësitë e mëdha që ka në mbrojtje, me mungesat e rëndësishme të Van Dijk dhe Gomez.
Geri Lineker ka pohuar sërish bastin e tij, që nëse Leicester fiton këtë sezon titullin, do të dalë në ekran të komentojë me mbathje.
Ekipi i Guardiolës nuk e fali dje Totenhamin e Mourinhos, duke e mundur 3 me zero, për pasojë Man City vijon galopin në krye të Premier League me 7 pikë më shumë se pasuesit e vendit të dytë, Leicester. Nëse sot në drekë fiton Manchester United, ekipi shkon në vend të dytë dhe konfirmohet si ndjekësi më i afërt për të rivalizuar the citizens.
