Ditën e hënë do të zhvillohet seanca raundi i dytë për zgjedhjen e Presidentit. Lajmi është bërë i ditur nga zyra e shtypit pranë Kuvendit, e cila njofton se mbledhja e Konferencës së Kryetarëve do të mbahet në orën 18:00.
Deri tani nuk ka asnjë emër për president dhe negociatat për zgjedhjen e presidentit të vendit mes mazhorancës dhe opozitës janë kthyer sërish në pikën zero. Pas dakordësisë që arritën palët në mbledhjen e konferencës së kryetarëve pak ditë më parë, ku opozita do të propozonte emrin e kandidatit për president në dy raundet e ardhshme e më pas socialistët, kryetari i grupit parlamentar të PD-së Enkelejd Alibeaj tha dje se mazhoranca ka prishur marrëveshjen e arritur me konsensus.
Alibeaj njoftoi se ka anuluar mbledhjen e grupit parlamentar, ku pritej të diskutoheshin emrat e kandidatëve për presidentin e ri, dhe tha socialistë kanë shkelur paktin që emri i presidentit t’i dërgohej Kuvendit me firma të përbashkëta, gjë që është mohuar nga kreu i grupit Parlamentar të PS, Taulant Balla. Sipas tij, Alibeaj është keakuptuar.
Këtë të shtunë nga Fieri, Balla tha se PD ka afat deri të dielën në orën 16:00 për të dërguar emrin e kandidatit, për të cilin mazhoranca do të thotë opinionin e saj.
“Ne jemi te gatshëm të mirëpresim kandidatura që vijnë nga opozita. Deri më sot nuk kemi marrë asnjë propozim zyrtar nga opozita. Në rast se këto propozime na vijnë, ne do të themi opinionin tonë për kandidaturat. Por për të shkuar më pas në seancë dhe deri nesër ora 16:00 koha është, që kandidatura të depozitohet zyrtarisht, pastaj Kuvendi të shprehet me votë, duhen firmat e mbështetësve të deputetëve. Kushtetuta thotë 20… Prandaj PS ka thënë prej ditës se parë nuk duam një president të Partisë Socialiste, por të të gjithë shqiptarëve. Dhe pastaj dhe PD e gjithë të tjerët nuk mund të kërkojnë një president të tyrin, siç kemi bëre debat me zotin Alibeaj, as i yni as i juaji. Hajde ta zgjidhim së bashku dhe ju e dini që grupi parlamentar i PS do t’i qëndrojnë asaj që ranë dakord. Nuk do të propozojmë asnjë kandidat as të hënën në datë 23, as të hënën në datë 30. Ne i qëndrojmë marrëveshjeve”, tha Balla.
