25 ditë para zgjedhjeve ndoshta më vendimtare në këto 3 dekada janë bërë fare të qarta për publikun dy strategjitë e konkurentëve kryesorë. Kreu i Opozitës është propozues, ka paraqitur një program të detajuar në gjithë fushat dhe po ashtu konceptin e tij për politikën, që ka të bëjë me kufizimin e pushtetit dhe llogaridhënien. Pra ofron një model krejt të kundërt nga këto 8 vite ku kreu i ekzekutivit ka hapur krahët në gjithë zyrat dhe institucionet, omnipotent me ndikim absolut në secilin sektor.
Çdo ditë të fushatës pak gjen tek kandidati për kryeministër, Lulzim Basha, fushatë negative, denigruese, baltëhedhëse aq më pak, damkosëse jo e jo.
Më anë tjetër, kemi Edi Ramën që në aspektin e ofertës nuk thotë asgjë, premton se nëse merr një mandat tjetër do të jetë e njëjta gjë si në këto 8 vite. Dhe nëse ka një gjë që gëzon sot konsensus maksimal në shoqëri, është që këto dy mandate ishin një dështim.
Një gjë Kryeministri po e bën çdo ditë, gazetarinë e keqe. Pra, nuk ja ka lënë thjesht në dorë mediave pranë tij atë punë, por është vendosur në krye të kësaj fushate.
Zakon e tipar prej se kur është në politikë kjo, por me intensifikimin e fushatës, Edi Rama s’bën tjetër pos portreteve të pautorizuara për kundërshtarët, me fyerje, me vrer, me bullizëm, duke lënë përherë më pak vend për elegancë e duke shtuar vrazhdësinë.
Nuk dihet se si ka arritur në këtë platformë dhe se sa mendon ai që do t’i japë rezultat, por të kërkosh të marrësh një mandat të tretë vetëm si gazetari e keqe, është jo vetëm larg të qënit një pretendim realist, por mjaft e çartur si përpjekje.
Gazetaria e keqe është një prej ndotësve më të mëdhenj të sferës publike dhe një prej arsyeve që e kanë bërë këtë vend ankthioz e të pajetueshëm. Jo pak prej aktorëve në këtë lëmi, asociohen ose identifikohen në sytë e njerëzve si shumë të afërt me qeverinë dhe kryeministrin.
Ti shtosh edhe më shumë doza, të bëhesh vetë udhëheqës i kësaj alternative është pak të thuhet se tingëllon e pazgjuar.
Një gjë është e sigurtë. Me 25 prill njerëzit do të votojnë kundër edhe gazetarisë së keqe.
