Aktualitet

Tenderi që prangosi Thoma Gëllçin














Bëni LIKE faqen zyrtare në Facebook
               Publikuar në : 22:35 - 08/10/21 |
mapo.al

Struktura e Posaçme Kundër Korrupsionit-SPAK-njoftoi mbrëmjen e kësaj të premteje (08.10.2021) arrestimin e ish-drejtorit të përgjithshëm të Televizionit Publik Shqiptar, Thoma Gëllçi, si edhe tre persona të tjerë Julian Tapia, Alban Malaveci dhe Ervin Muraj, nën dyshimet për shpërdorim detyre në zhvillimin e një tenderi me vlerë mbi 800 milionë lekë të vjetra, të zhvilluar në vitin 2018






Janë të publikuara edhe të dhënat mbi tenderin që çoi në prangosjen e drejtorit jetëgjatë të eminentit mediatik publik.


Në Tetor 2018, Radio Televizioni Shqiptar publikoi njoftimin për tenderin “Blerje pajisje për kanalin RTSH Agro”, me fond limit 86.9 milionë lekë të reja.










Sipas të dhënave zyrtare, rezultatet e tenderit janë bërë publike në ditën e fundit të vitit 2018, pikërisht në datën 31 dhjetor.



Në tender rezulton të kenë marrë pjesë dy operatorë ekonomikë. Konkretisht;

– “TBS-96”, e cila ka paraqitur ofertën ekonomike me vlerë 84.963.000 lekë, dhe;

– “Eurokontakt”, e cila ka paraqitur ofertë ekonomike me vlerë 65.462.720 lekë.

Duket qartë se diferenca mes ofertave të dy operatorëve është rreth 200 milionë lekë të vjetra.

Megjithatë, në përfundim, autoriteti prokurorues, pra Televizioni Publik Shqiptar ka shpallur fitues kompaninë ‘TBS” shpk, e cila ka paraqitur ofertën më të lartë.

Lexo edhe :  Një tjetër tender i 'shkëlqyer' në infrastrukturë

Çështja e “blerjes së aparaturave për kanalin Agro-TVSH” është përmendur edhe në Raportin Vjetor të Televizionit Publik Shqiptar për vitin 2018, të dorëzuar në Parlament.

Dhe, duket se ka pasur një problematikë që në atë kohë.

Në atë raport, citohet: “Investimi për blerje pajisje RTSH Agro, në fakt, ishte parashikuar të realizohej nga financimi buxhetor, por në fund të vit 2018 RTSH me akt normav i hiqet vlera e investimeve.

Kjo vlerë detyrimi është njohur nga Ministria e Financave dhe mbetet të zgjidhet situata e shtesës së këtij fondi gjatë periudhës në vijim”.

Deri në momentin e publikimit të këtij artikulli, ende nuk janë bërë të qarta shkeljet konkrete dhe përgjegjësitë e personave të arrestuar.

Ajo që dihet deri më tani është fakti që Thoma Gëllçi dhe personat e tjerë janë prangosur, pasi Gjykata e Posaçme Kundër Korrupsionit dhe Krimit të Organizuar i ka vlerësuar të mjaftueshme provat e deritanishme të SPAK-ut, i cili dyshon se këta shtetas kanë kryer veprën penale të “shpërdorimit të detyrës”.

LEXO EDHE:

Abuzim me tenderat, arrestohet ish-drejtori i RTSH, Thoma Gëllçi dhe 3 të tjerë

1


Etiketa: ,

Pas