Konfindustria, duke marrë shkak nga shqetësimet e bizneseve, me anë të një njoftimi për shtyp kërkon marrjen e masave sa më të shpejta për përmirësimin e rrugës dytësore të Zonës Industriale të Tiranës në autostradën Durrës-Tiranë.
Në zonën industriale në fjalë janë përqendruar më shumë se 70% e njësive industriale të kryeqytetit.
“Rruga në të dy anët e autostradës Tiranë -Durrës është në gjendje mjaft të dëmtuar, duke krijuar vështirësi të shumta në qarkullimin e mjeteve, dëmtimin e tyre, rritjen e papranueshme të kostove dhe sidomos përbën një rrezik të lartë edhe për aksidente dhe sigurinë e jetës. Gjithashtu, ngarkesa e lartë e qarkullimit të mjeteve në zonë përbën një ngarkesë të ndjeshme edhe për dëmtimin e mjedisit për Tiranën edhe kështu në gjendje të rënduar dhe jashtë çdo standardi ndërkombëtar të lejuar“, thuhet në njoftimin për shtyp.
Gjithashtu në njoftim thuhet se skema e sotme e menaxhimit të mirëmbajtjes të sistemit rrugor është e dështuar.
Sipas Konfindustria edhe pse financimet e mirëmbajtjes së sistemit rrugor i kushtojnë mjaft shtrenjtë buxhetit të shtetit dhe taksapaguesve shqiptarë, cilësia e shërbimit është mjaft e ulët.
“Konfindustria, duke marrë shkak nga shembulli i mësipërm, por edhe nga gjendja e vështirë e infrastrukturës rrugore në pothuaj të gjitha akset e tjera të rëndësishme kombëtare vlerëson, se skema e sotme e menaxhimit të mirëmbajtjes të sistemit rrugor është e dështuar. Këtu përfshihet edhe projekti përkatës i financuar me kredi nga Banka Botërore. Pavarësisht, se financimet e mirëmbajtjes së sistemit rrugor i kushtojnë mjaft shtrenjtë buxhetit të shtetit dhe taksapaguesve shqiptarë, cilësia e shërbimit është mjaft e ulët, me shenja të qarta të shpërdorimit, subjektivizmit dhe korrupsionit”, përfundon njoftimi.
