Vera kishte ardhur në Itali nga Greqia rreth 8 vite më parë për t’u bashkuar me dy vëllezërit që ndodheshin atje. Pak më vonë asaj iu bashkua Viron, me të cilin më pas u transferua në Spinea.
Të dy kishin marrë një shtëpi të madhe, në të cilën kishin investuar mijëra euro ndër vite për ta përshtatur për nevojat e njërës prej dy vajzave me aftësi të kufizuara motorike. Sipas fqinjëve, burri ishte bërë shpejt i dhunshëm dhe në fund Vera e braktisi për të nisur jetën e saj të re.
Pas ndarjes, ajo përveshi menjëherë mëngët duke punuar në hotele të ndryshme, në qendrën historike të Venecias dhe më pas, me fillimin e pandemisë, vendosi të bëhej parukiere dhe estetiste. Kështu ajo kishte arritur të krijonte një rreth të madh klientësh, disa prej të cilëve ishin shumë besnikë. Ata që e njohën e përshkruajnë si një grua të përkushtuar ndaj punës dhe gjithmonë e sjellshme. “Ajo nuk foli kurrë keq për ish-bashkëshortin e saj – tha një nga klientët e 37-vjeçares -. E gjithë vëmendja e saj ishte e përqendruar tek vajzat dhe fliste vetëm për to”.
Një vit e gjysmë më parë ajo kishte nisur një lidhje me Flonino Merkurin , 23 vjeç. Me të ajo kishte gjetur më në fund qetësinë dhe së shpejti do të fillonin një jetë së bashku, në shtëpinë e saj në Spinea, që 37-vjeçarja kishte blerë vite më parë së bashku me ish-bashkëshortin për vajzat e saj. Ky do të ishte motivi i krimit të kryer nga Viron Karabollaj. Sipas rikonstruksioneve të para, burri kishte mbajtur kontakte me familjen për të parë dy vajzat dhe për të kaluar periodikisht kohë me to, por nuk kishte marrëdhënie të mira me ish-partneren. Vera, në fakt, kishte qenë disa herë viktimë e dhunës së tij gjatë lidhjes së tyre.
