KAKAVIJË – Një aksident tragjik ka ndodhur paraditen e të shtunës në aksin nacional Kakavijë-Gjirokastër në afërsi të “kthesës së Bularatit”.
Një fëmijë 10-vjeçar me iniciale S. N. nga Lezha, i cili po kalonte rrugën, është përplasur nga një autoambulancë, e cila me shpejtësi po transportonte një grua të sëmurë për të marrë ndihmë mjekësore në spital.
Fëmija ka qenë duke pritur në radhë bashkë me familjen për të hyrë në territorin grek. Kjo e rëndon më shumë situatën në këtë pikë kufitare.
Qytetarët deklarojnë se autoambulanca lëvizte me shpejtësi, ndërkohë që sipas tyre ishte bosh. “Nuk kishte njerëz brenda, ishte bosh. Lëvizte me shpejtësi”, tha një prej qytetarëve. Ndërkohë që policia thotë se autoambulanca po transportonte për në spitalin e Gjirokastrës një grua të sëmurë.
Pas aksidentit të autoambulancës, policia bën të ditur se e sëmura është dërguar në spital nga një automjet i patrullës. Ndërsa drejtuesi i autoambulancës, Admir Golemi, është shoqëruar në komisariat.
Gjirokastër/ Informacion paraprak
Rreth orës 10:30, në aksin nacional Kakavije – Gjirokastër, në afërsi të kthesës së Bularatit, një autoambulancë me drejtues shtetasin A. G, që po transportonte një shtetase të sëmurë për në spitalin rajonal Gjirokastër, ka përplasur këmbësorin, shtetasin S. N., 10 vjeç, banues në Lezhë, i cili ka humbur jetën.
Drejtuesi i ambulancës është shoqëruar për në ambientet e Komisariatit të Policisë Gjirokastër, ndërsa shtetasja e sëmurë është transportuar me makinë policie drejt spitalit rajonal Gjirokastër.
Në vendngjarje ndodhet grupi hetimor dhe po punon për zbardhjen e plotë të ngjarjes.
LEXO EDHE:
Aksidenti i mori jetën fëmijës në Kakavijë, qytetarët të revoltuar: Ambulanca ishte bosh