Aktualitet

‘Transferta’/ Përfitoi 38,000 euro duke mashtruar në Facebook, pranga 29-vjeçarit








Bëni LIKE faqen zyrtare në Facebook
               Publikuar në : 11:47 - 05/08/20 |
mapo.al

Një 29-vjeçar i shpallur në kërkim është vënë në pranga, pasi akuzohet për veprën penale “Mashtrim kompjuterik”.


Shkëlzen Bytyqi në bashkëpunim me persona të tjerë të arrestuar, për një periudhë 1-vjeçare kanë ndërhyrë në llogari të ndryshme në Facebook, duke ndryshuar të dhënat e tyre.


Më pas i kanë përdorur këto llogari për të komunikuar me miq të personave që ua kanë vjedhur dhe për t’u kërkuar shuma të ndryshme parash.


Shuma e përfituar nëpërmjet mashtrimit ka arritur në 38,000 euro.


Njoftimi i Policisë:

Tiranë

Vijon operacioni “Transferta”.

Shkon në 10 numri i të arrestuarve.

Kapet dhe vihet në pranga 1 shtetas i shpallur në kërkim në vijim të këtij operacioni.

Në vijim të operacionit policor të koduar “Transferta”, për goditjen e veprimtarisë kriminale në fushën e krimeve kompjuterike, finalizuar një muaj më parë nga DVP Tiranë, si rezultat i të cilit u vunë në pranga 9 shtetas, ka vijuar puna me hetime të thelluara, nën drejtimin e Prokurorisë së Rrethit Gjyqësor Tiranë, për identifikimin dhe kapjen e personave të tjerë të implikuar në këtë veprimtari kriminale.

Në vijim të hetimeve është shpallur në kërkim edhe shtetasi Sh. B., pasi ka rezultuar se ishte i implikuar në këtë veprimtari kriminale.

Në vijim të operacionit, nga shërbimet e Policisë u bë kapja e shtetasit Sh. B. dhe ekzekutimi i urdhrit të ndalimit të lëshuar nga Gjykata, e cila ka vendosur masën e sigurimit “Arrest në burg”, për veprën penale “Mashtrim kompjuterik”, për shtetasin e shpallur në kërkim Sh. B., 29 vjeç.

Ky shtetas, në bashkëpunim me shtetasit e tjerë të arrestuar, për një periudhë 1-vjeçare, ka ndërhyrë në llogari të ndryshme të rrjetit social Facebook, duke ndryshuar të dhënat e tyre dhe më pas i kanë përdorur për të komunikuar me miq të këtyre llogarive. Me anë të mashtrimit kanë kërkuar shuma të ndryshme monetare dhe si rezultat kanë përfituar shumën 38000 euro.

Vijon puna për dokumentimin dhe mbledhjen e provave të tjera, si dhe për evidentimin dhe arrestimin e personave të tjerë të përfshirë në këtë aktivitet të kundërligjshëm.

Materialet i kaluan Prokurorisë së Rrethit Gjyqësor Tiranë, për veprime të mëtejshme.


Etiketa:

Pas