Shqiptarët kanë qenë si në palën e së mirës, ashtu edhe në atë të keqes, gjatë sulmit të djeshëm terrorist në Vjenë, ku u vranë 5 persona dhe u plagosën të paktën 17 qytetarë.
Ministrja e Jashtme e Kosovës, Meliza Haradinaj-Stublla deklaroi sot në Berlin, para takimit me homologun gjerman, Heiko Maas se tre prej efektivëve që iu përgjigjën sulmeve të mbrëmshme ishin shqiptarë, të mirëintegruar në Vjenë.
“Kosova dënon njëzëri sulmet e natës së shkuar në Vjenë. Nuk do të jap komente mbi burime të pakonfirmuara, por do të doja të nënvijëzoja disa fakte të rëndësishme mbi atë çfarë ka ndodhur dje.
Tre prej efektivëve të policisë që iu përgjigjën sulmeve të mbrëmshme ishin shqiptarë, shtetas të Kosovës, të cilët jetojnë të mirëintegruar në Vjenë dhe punojnë e luftojnë krahas qytetarëve austriakë për të mbrojtur vlerat dhe qëllimet që ne ndajmë me popullin austriak.
Le të reflektojmë mbi këtë dëshmi të mirë integrimit të qytetarëve tanë dhe faktit se Kosova qëndron përkrah aleatëve tanë në luftën kundër ISIS dhe terrorizmit”,- tha Haradinaj Stublla.
Risjellim në vëmendje se atentatorët e sulmit terrorist kanë rezultuar me origjinë nga Maqedonia e Veriut dhe Kosova.
LEXO EDHE:
Sulmi terrorist në Vjenë, gazetari austriak: Njëri nga autorët, me origjinë shqiptare
