Një tjetër tërmet i fuqishëm regjistrohet sot në Kroaci. Sipas Qendrës Europiane të Tërmeteve, lëkundja sizmike ishte 6.3 të shkallë Rihters, me epiqendër pranë qytetit Petrinja dhe Sisak.
Mendohet se dëmet materiale janë të shumta, si çati të shëmbura, fasada ndërtesash dhe madje edhe disa godina banimi. Ndërkohë, pritet një raportim zyrtar, edhe për të ditur nëse ka apo jo të lënduar ose viktima.
Sipas televizionit rajonal N1, një ndërtesë e prekur nga tërmeti i së hënës u shkërmoq duke rënë mbi një makinë brenda së cilës ndodhej një burrë.
Pamjet e transmetuara tregojnë zjarrfikësit teksa përpiqen të heqin inertet nga mjeti, dhe t’i vijnë në ndihmë drejtuesit. Ky i fundit është dërguar me urgjencë në spital, për trajtim të nevojshëm mjekësor.
Dje Kroacia u godit nga një tërmet me magnitudë 5.2 të shkallës Rihters, po me epiqendër rreth 50 kilometra në juglindje të Zagrebit, që u pasua brenda pak minutash nga një lëkundje sizmike me magnitudë 4.9.
*Fotografia e mësipërme tregon Ministrinë e Ndërtimit në Zagreb, të prekur nga tërmeti 6.3 ballësh
