Vjen reagimi publik i mjekes së Infektivit Migena Qato, pas denoncimit të dy vajzave, se i ati, Rihat Lalo, ndërroi jetë në spital nga mungesa e shërbimit.
Ajo thotë për “Ballkan Web” se, pacienti është paraqitur në spitalin Covid1 në orën 16:30, dhe është vendosur menjëherë në oksigjeno-terapi.
Mjekja gjithashtu pretendon se skaneri është realizuar 45 minuta pas mbërritjes së Rihat Lalos në spital, në 17:15, dhe se vajzat e të ndjeri janë njoftuar për situatën e tij të rënduar shëndetësore nga personeli.
“Pavarësisht se me detaje do të merren instancat përkatëse, ashtu siç e meriton situata, dua të sqaroj se pacienti ka arritur në ambientet e COVID-1 në orën 16:30. Duke qenë se është paraqitur në gjendje të rënduar, është vendosur në oksigjeno-terapi. Ka marrë ndihmën e parë, është vlerësuar më pas oksigjenimi në gjak të tij.
U desh 40 minuta të arrinim në kushte të duhura, për ta vendosur në skaner. Pacienti është çuar në skaner për t’u vlerësuar në kushte të rënda respiratore, jo më tepër se 45 minuta pas mbërritjes së tij në spital. Skaneri është realizuar rreth 17:15 minuta. Pas skanerit është vendosur në terapi intensive, ishte gjendje e rëndë që në ardhje dhe u rëndua më shumë në ditët e vazhdim.
Nëse pacienti ka ardhur në spital deri 16:30, edhe pse numri rezultonte i fikur, ne e kemi telefonuar zonjat në 17:30 dhe i kemi shpjeguar situatën. Nuk dua të ndaj detaje nga biseda ime me zonjat. E para, kërkesa e tyre shumë e dyzuar. Ata thonin njëherë për të marrë babain nga Infektivi, fillimisht kanë pasur dëshirën ta marrin dhe më pas nuk kanë dashur. Dhe rekomandimet mjekësore i merrnin nga konsulta jashtë Shqipërisë.
Nuk ndryshoj asnjë presje nga ajo që kam thënë. Çdo sugjerim mjekësor duhet të realizohet duke e pasur pacientin përpara. Këtë gjë ia kam sugjeruar dhe motrave. Pacienti ka shkelur në 16:30, ka filluar menaxhimi i menjëhershëm i pacientit. Nuk dua të përkufizoj fjalë si të pa gënjeshtërta, është mendim i zonjave çdo pretendim. Pacienti është menaxhuar siç e don protokolli COVICD”, – shprehet mjekja Migena Qato.
Risjellim në vëmendje se për motrat Lalo, mbesat e ish-deputet demokrat Vili Minarolli, Policia ka nisur hetimet për informacione të rreme. Nga ana tjetër, vajzat u shprehën dje, po për mikrofonin e “Ballkan Web”, se kërkojnë nga personeli i Infektivit dosjen e plotë të babait të tyre.
