Lihet në qeli pedagogu i Fakultetit të Shkencave të Natyrës në Korçë, Alket Dino dhe sekseri Xhevi Dervishi. Gjykata kundër Krimit dhe Korrupsionit ka dhënë sot për ta masën e sigurisë “arrest me burg”, nën akuzën për mitmarrje.
Familjarët e të arrestuarve, të cilët ndodheshin në hyrje të gjykatës, u shprehën për mediet se për këtë çështje do të flasë drejtësia. “S’kemi asgjë për të thënë, do të flasë drejtësia. Nuk ka lidhje asgjë me çfarë thuhet”, thanë ata.
Alket Dino dhe Xhevi Dervishi u arrestuan në Fakultetin e Shkencave të Natyrës në Korçë, teksa iu gjetën një sasi prej 300 eurosh dhe 50.000 lekësh, të cilat nga hetimet e kryera dyshohet se i kanë përfituar në mënyrë të kundërligjshme nga studentët në këmbim të dhënies së provimeve.
Hetimet u ndërmorën nga Specialistët për Hetimin kundër Korrupsionit në Drejtorinë Vendore të Policisë Korçë, nën drejtimin e SPAK.
Në dosjen e SPAK janë përfshirë tabulatet telefonike mes pedagogut dhe sekserit, përgjimet ambientale si dhe janë siguruar disa teza provimesh që kishte dyshime se për vlerësimin pozitiv të tyre, ishin marrë para.
