Publikohen pamje nga shpërthimi i bombolës së gazit në Velipojë, në një ambientet e një hoteli pushuesish. Katër persona mbetën të plagosur, anëtarë të një familje, nëna me tre fëmijët e saj, ndërsa gjendja e tyre shëndetësore paraqitet e rënduar.
Ata janë transportuar në Spitalin e Traumës në Tiranë dhe sipas mjekëve dëmtimet nga djegia janë të një shkalle mjaft të rëndë.
Gazeta MAPO sjell pamje nga vendi i ngjarjes ku siç duket, shpërthimi ka qenë mjaft i fuqishëm pasi ka lënë pasoja te i gjithë hoteli. Dëmtimet kanë ardhur si rrjedhojë e zjarrit që përfshiu një pjesë të ndërtesës dhe shpërthimit që ka qenë mjaft i fortë.
Alketa Gjoka kishte mbërritur te hoteli i saj mbrëmjen e kaluar, bashkë me tre fëmijët, dy vajzat dhe një djalë. Në mëngjes ajo ka tentuar të bëjë kafen kur bombola e gazit ka shpërthyer edhe e gjithë dhoma është përfshirë nga flakët. Alketa dhe tre fëmijët e saj, Daniela, Klasira dhe Enriko vetëm 12 vjeç, kanë arritur të dalin nga hoteli dhe janë hedhur në pishinën me ujë, ku edhe janë gjetur më pas nga persona të tjerë dhe të afërmit.
Shpërthimi është dëgjuar në të gjithë plazhin e Velipojës. Ngjarja e sotme në Velipojë vjen një javë pas masakrës me 4 të vdekur për shezlongët.
