Kreu aktual i Komunitetit Mysliman të Shqipërisë Skënder Bruçaj, ka reaguar në lidhje me tërheqjen e tij nga gara. Bruçaj shrpehet se u tërhoq për ti hapur rrugë një teologjie të re.
“Jam i mendimit që mes jush, siç janë dhe kandidatët sot, ka edhe më të mirë se unë për ta kryer këtë detyrë të rëndë dhe me përgjegjësi. Prandaj vendosa mbrëmë tërheqjen nga një rikandidim për të hapur dhe një rrugë të re, jo vetëm dhe një rotacioni, por tashmë edhe teologëve të nderuar, që kanë mbaruar universitet më të mira islame në botë. Duke ju uruar kandidatëve suksese në garë, u drejtohem juve anëtarëve të Këshillit të Përgjithshem, që votimi për kryetarin është i fshehtë, pra mes ndergjegjes tuaj dhe Zotit. Votoni për kë mendoni se mund të bëhet më e hajrit për institucionin në raport dhe me përgjegjësinë që do marre dhe mos harroni, që nesër do ju pyesë Zoti edhe për këtë zgjedhje që do bëni. Unë jam vetëm se njëri prej jush dhe dëshiroj të vazhdoj i tillë edhe në vazhdim”, – u shpreh Skënder Bruçaj.
Nga gara disa orë para votimit u tërhoq edhe Islam Hoxha.
Ndërkohë burime të Gazetës Mapo bëjnë me dije se përfaqësues të OSBE dhe të Ambasadës Amerikane në Tiranë, po monitorojnë procesin për zgjedhjen e kreut të ri të KMSH. Në garë tashmë mbeten vetëm 3 kandidatë, Bujar Spahiu, nënkryetar i KMSH, Ylli Gurra, Myftiu i Tiranës dhe Gramos Blliku, Myftiu i Lushnjës. Do të jenë 35 myftinj, 12 anëtarët e kryesisë së KMSH dhe 45 anëtarë të shoqërisë civile, që me votë të fshehtë do të zgjedhin kryetarin për një mandat 5-vjeçar. Rezultatet e votimit pritet të bëhen sot publike.
