Sfida kualifikuese e Botërorit, Katar 2022 Angli-Shqipëri rrezikon të luhet pa prezencë tifozësh.
UEFA ka vendosur të dënojë Federatën Angleze të futbollit me një ndeshje pa tifozë në stadiumin kombëtar “Wembley’ pas trazirave të ndodhura gjatë finales së Euro 2020 mes Italisë dhe Anglisë.
Dënimi mund të shlyhet që në sfidën e radhës, çka korrespondon me përballjen mes “Tre Luanëve’ dhe kuqezinjve tanë, në program për tu luajtur më 11 nëntor të këtij viti. Federata e Futbollit Anglez gjithashtu u gjobit me 100,000 euro për “mungesën e rendit dhe disiplinës brenda dhe rreth stadiumit”.
“Edhe pse jemi të zhgënjyer me vendimin, ne e pranojmë rezultatin e këtij vendimi të UEFA -s,” thuhet në njoftimin e Federatës Angleze.
Tifozët sulmuan policinë dhe punonjësit e rendit teksa u përpoqën të depërtonin në stadiumin “Wembley’ për ndeshjen e 11 korrikut, ku Anglia e humbi ndaj Italisë me penallti. Qindra tifozë u futën në stadium pa bileta.
Shumë u ulën në zonën e rezervuar për të afërmit e lojtarëve. Rreth 51 persona përfunduan në pranga pas trazirave të shkaktuara. Një dënim i tillë me mungesë tifozësh në shkallët e impiantit “Air Albania” rrezikon dhe kombëtarja shqiptare e futbollit pas hedhjes së sendeve të forta në drejtim të futbollistëve miq në humbjen 1-0 ndaj Polonisë.
Etiketa: Angli, Shqipëri, Wembley
