Unioni i Këshillave Studentorë, ditën e sotme, me anë të një një deklarate i kanë vendosur disa kushte Ministrisë së Arsimit dhe Sportit lidhur me procesin zgjedhor për autoritetet dhe organet drejtuese në institucionet publike të arsimit të lartë.
Ata kërkojnë shtyrjen e datës së zgjedhjeve për autoritetet dhe organet drejtuese të institucioneve publike të arsimit të lartë për shkak të gjendjes së fatkeqësisë natyrore të shaktuar nga pandemia e COVID-19
Në rast të mos shtyrjes së datës së zgjedhjeve ata duan nga Ministria e Arsimit dhe Sportit në bashkëpunim me Universitetet të plotësojnë kushtet e transportit të studentëve që ndodhen nëpër rrethe, në mënyrë që ata të mos mungojnë në votime.
“Nëse Ministria e Arsimit dhe Sportit nuk ndjek ecurinë e Urdhrave që ajo vetë lëshon dhe nëse nuk merr për bazë kushtet tona si Union i Këshillave Studentorë ky proces zgjedhor nëpër universitete është i minuar dhe nuk ka aspak besueshmëri!”, përfundojnë ata.
Kujtojmë se dy ditë më parë me anë të një urdhri të ministres së Arsimit u hap zyrtarisht gara për organet drejtuese në Universitete. Dhe është vendosur data 30 korrik 2020 për t’u zhvilluar këto zgjedhje.
UNIONI I KËSHILLAVE STUDENTORË
Tiranë, më 02.07.2020
DEKLARATË
UNIONI I KËSHILLAVE STUDENTORË po ndjek me vëmendje të madhe procesin zgjedhor për autoritetet dhe organet drejtuese në institucionet publike të arsimit të lartë.
Për një proces sa më gjithëpërfshirës dhe sa më të besueshëm ne si UNION I KËSHILLAVE STUDENTORË kërkojmë plotësimin e këtyre kushteve:
1. Duke qenë se 75 % e studentëve nuk ndodhen në auditoret e universitetit pasi sipas urdhrit të MASR vitet e ndërmjetme do kthehen në universitete jo më para se muaji Gusht kërkojmë që Ministria e Arsimit dhe Sportit në bashkëpunim me Universitetet të plotësojnë kushtet e transportit të studentëve që ndodhen nëpër rrethe. Nuk mund të ketë një proces të drejtë kur mungojnë në votime studentët.
2. Kandidatët për Rektor/Dekan por edhe për Senat Akademik duhet të plotësojnë çdo KUSHT që përmban rregullorja e zgjedhjeve nëpër universitetet publike.
3. Të garantohet angazhimi i marrë në kuadër të paktit për Universitetin, përcaktuar në pikën 4 të Urdhrit të MASR Nr. 8, datë 14.1.2020 “për procesin zgjedhor për autoritetet dhe organet drejtuese në institucionet publike të arsimit lartë” i ndryshuar dhe pikën 3 të Urdhrit nr.108, datë 8.5.2020 “Për shtyrjen e datës së zgjedhjeve për autoritetet dhe organet drejtuese të institucioneve publike të arsimit të lartë për shkak të gjendjes së fatkeqësisë natyrore të shaktuar nga pandemia e COVID-19” me qëllim garantimin e integritetit akademik të kandidatëve për autoritete drejtuese Rektor/Dekan nëpërmjet procesit të verifikimit të ligjshmërisë së fitimit të gradës shkencore dhe titullit akademik, përfshirë kontrollin antiplagjaturë.
Nëse Ministria e Arsimit dhe Sportit nuk ndjek zbatimin e urdhrave që ajo vetë lëshon kjo sjell minimin e besueshmërisë tek zgjedhjet. Nëse këto KUSHTE nuk merren parasysh ne e quajme këtë proces një farsë dhe nuk e njohim rezultatin e dalë nga këto votime.
Etiketa: kushte, ministrisë, UKS
