Rajoni

Urdhërarrest për Milan Radojiçiç, dyshohet për vrasjen e Ivanoviç…








Bëni LIKE faqen zyrtare në Facebook
               Publikuar në : 16:04 - 24/01/19 |
mapo.al

Një urdhërarrest është lëshuar për Milan Radojçiç, pasi dyshohet se është përfshirë në vrasjen e politikanit serb Oliver Ivanoviç. Pritet që për të akuzuarin të lëshohet dhe një urdhërarrest ndërkombëtar.  Prokurori i këtij rasti ka konfirmuar për Gazetën Express se Prokuroria Speciale e Kosovës ka lëshuar urdhërarrestin vendor më datë 21 janar.


“Mund të ju konfirmoj që Prokuroria Speciale e Kosovës më datë 21 janar ka lëshuar urdhërarrest vendor për Milan Radojciçin, si të dyshuar për përfshirje në rastin e Oliver Ivanoviçit”, shprehet Syla.


Ndërsa, brenda pak ditësh pritet që ndaj nënkryetarit të arratisur të Listës Srpska, të lëshohet urdhërarrest ndërkombëtar. “Prokuroria në bazë të kompetencave të saja pritet që së shpejti të lëshojë urdhërarrest ndërkombëtar”, ka thënë Syla.


Radojçiç, i cili konsiderohet si njeriu më i fuqishëm i Veriut, ka qenë target në një operacion të kryer nga njësitë speciale të Kosovës në orët e para të mëngjesit të 23 nëntorit.


Zyrtari i lartë i Listës Srpska, që cilësohet si i dyshuari kryesor në rastin e Ivanoviçit, ishte arratisur, ndërsa policia arrestoi tre të tjerë, të cilët po mbahen në paraburgim. Në mesin e të arrestuarve është Marko Rosiq, pjestar i Policisë së Kosovës, dhe Ndeljko Spasojeve e Dragisha Mirkoviç.


Ndërsa dy ditë pas kësaj bastisjeje, Radojçiç u shfaq në publik nga Beogradi dhe tregoi se ndodhej në Serbi. Ai po organizonte disa tubime në fshatrat me shumicë serbe në Kosovë, mirëpo vetë nuk u duk asnjëherë.

Ditë më parë, prokurori Hoxha ka thënë në Televizionin 7 se të gjitha provat e siguruara nga Prokuroria Speciale tregojnë se Radojçiç është përfshirë në vrasjen e Ivanoviçit. Oliver Ivanoviç, ish-ministër dhe ish-deputet në Kuvendin e Kosovës ka udhëhequr SDP-në, ndërsa u vra më 16 janar të vitit 2018./Express/


Etiketa: , , ,

Pas