Nënkryetarja në detyrë e Partisë Demokratike, Jorida Tabaku, ka denoncuar PPP-të si një tjetër shkak i përkeqësimit të ekonomisë, në këtë periudhë krize.
“Në mesin e një krize të thellë ekonomike, qeveria ka vazhduar politikat e saj të pagesave të PPP-ve që kanë përkeqësuar gjithnjë e më shumë shëndetin financiar të buxhetit”, theksoi Tabaku.
Sipas Tabakut, “familjet shqiptare që shpenzojnë 42% të të ardhurave të tyre po përballen me rritjen e çmimeve ndërsa inflacioni pritet të shkojë më lartë se 5%. Të gjithë produktet kryesore të shportës së ushqimeve janë rritur me mbi 10% duke shtrenjtuar jetesën e shqiptarëve”.
“Po shpenzohet më shumë për energjinë, për bukën, për qumështin dhe vezët. Çdo gjë më e shtrenjtë! Çdo produkt më i kushtueshëm ndërsa të ardhurat vetëm tkurren”, theksoi ndër të tjera ajo në një postim në rrjetet sociale.
Ndërkohë mbi situatë që po kalojmë, Jorida Tabaku e konsideroi një fatkeqësi qeverinë.
“Zgjidhja e qeverisë? Më shumë fonde për inceneratorët, për PPP-të dhe koncesionet! Më shumë taksa për qytetarët dhe më pak të ardhura për shqiptarët! Pasi taksat e shqiptarëve janë fitimi koncesionarëve!”.
“Fatkeqësi që në një kohë krize shqiptarët kanë një qeveri që u merr gjithçka shqiptarëve dhe ua jep oligarkëve!”, mbyll reagimin e saj Jorida Tabaku.
