Në fillim ishte qeveria ajo që pasi “mati pulsin” e të rinjve, duke i paralajmëruar se mund t’i fusë në kategorinë e personave që do të vaksinohen me detyrim, e bëri fakt të kryer disa ditë më vonë.
E tanimë, janë studentët e pavaksinuar ende, të cilët vijojnë rezistencën me shpresën se qeveria mund të ndryshojë qëndrim. Skeptikët e vaksinës mbeten ende të tillë.
“Nuk kam bërë asnjë dozë dhe as kam ndërmend ta bëj, por as të lë shkollën”, shprehet një studente në Fakultetin e Gjuhëve të Huaja, pa dashur të identifikohet.
Ndërsa shoqja e saj e grupit ka një tjetër pretendim.
“Jam vaksinuar me të dyja dozat, që përpara se të nisë shkolla. Por, shikoj që një pjesë e madhe nuk e kanë injektuar. Më vjen keq për këtë, pasi unë nuk isha e bindur për ta bërë. Ndërkohë që po shikoj se në klasë po futen njësoj, si të vaksinuarit dhe të pavaksinuarit”.
Një përqindje e konsiderueshme, me apo pa hir, kanë injektuar së paku një dozë. Sikundër ka edhe nga ata të rinj të pavaksinuar që frekuentojnë mësimin në fakultete pa kartonin e verdhë të vaksinës anti-COVID. E gjithë kjo javë mësimi thuhet se do të jetë më shumë eksperimentale.
Në shumicën e fakulteteve hyrjet monitorohen vetëm për maskë, por nuk mungojnë rastet sporadike kur punonjësit e sigurimit insistojnë për kartonin e verdhë, si kusht për t’u futur në klasë.
Që nga fillimi i shtatorit e deri në muajin ku jemi, ministritë e linjës, ajo e Shëndetësisë dhe Arsimit kanë apeluar shpesh të rinjtë që të vaksinohen. Madje, Evis Kushi zbarkoi të martën në terren për të kontrolluar nëse studentët e kishin kryer apo jo injeksionin.
Midis tyre, nuk mungonin ata që thanë hapur se ishin ndjerë të detyruar të vaksinoheshin, pasi në të kundërt humbisnin mësimin, si edhe ata që lëviznin lirshëm në ambientet e brendshme, të pavaksinuar. Ndërsa titullarët e universiteteve ndodhen midis dy presionesh.
Atij të qeverisë për respektimin e urdhrit për të mos lejuar asnjë student pa certifikatë vaksinimi në klasë dhe nga të rinjtë që thonë se kanë gjithë të drejtën për të mos futur në trup asnjë lëndë për të cilën nuk janë të bindur.;