Valdrin Pjetri dhe Altin Doda djemtë e baballarëve të pushtetshëm

Më 27 Janar 2003 dy të rinj shqiptarë që kishin shkuar për studime në Firence të Italisë kapen duke trafikuar drogë. Ata janë Valdrin Pjetri dhe Altin Doda. Më datë 12 Qershor 2003 ata u dënuan me 18 muaj burg dhe 1000 Euro gjobë. Më pas autoritetet italiane i dëbuan dy të rinjtë shqiptarë që në Shqipëri nuk ishin as më shumë as më pak, por djali i një ministri dhe djali i një drejtori të rëndësishëm. Konkretisht Valdrin Pjetri, djali i Luigj Pjetrit që në vitin 2003 mbante detyrën e Drejtorit të Divizionit dhe Shpërndarjes në KESH dhe Altin Doda, djali i ministrit të Energjetikës në qeverinë Nano, Viktor Doda.

Kjo histori nuk kishte për të dalë kurrë, nëse Valdrin Pjetri nuk do ti ngjiste me shpejtësi shkallët e karrierës, si drejtor Hipoteke, Prefekt në Shkodër, kandidat për Kryetar Bashkie, dhe drejtues politik i PS-së në Shkodër. Gjithashtu kjo histori nuk kishte për të dalë, nëse sot nuk do të kishim ligjin e Dekriminalizimit. Dhe pikërisht në formularin e Dekriminalizimit Valdrin Pjetri ka shkruar se nuk është dënuar asnjëhere, por Partia Demokratike zbuloi dhe provoi me dokumente se Valdrin Pjetri, sot pretendet për të drejtuar Bashkinë e Shkodrës, 16 vite më parë është dëbuar nga Itali si trafikant droge.

PD-ja me 1 gur vrau dy zogj! Bashkë me Pjetrin u zbulua edhe Altin Doda, që është koordinatori i PS në njësinë 3 në Tiranë.

Ky nuk është rasti i parë që kreu i qeverisë Edi Rama katapulton në poste shumë të rëndësishme njerëz me të shkuar kriminale. Ajo çka është problematike është se Kryeministri nuk mban asnjëherë përgjegjësi për veprimet e tij. Valdrin Pjetri rrezikon të mos hyjë kurrë në Bashkinë e Shkodrës, një bashki kjo e drejtuar historikisht nga e djathta. Gjithsesi fjalën e fundit pritet ta thotë prokuroria e cila ka tagrin ti kërkojë KQZ-së ndërprerjen e mandatit të Pjetrit dhe nisjen e hetimeve për të, pasi ka mashtruar me formularin e Dekriminalizimit.

Meqenëse u zbulua se Valdrini me të shkuar kriminale nuk është krejt rastësisht në politikë, tashmë do të presim të shohim se çfarë do të bëjë Kryeministri Rama dhe PS-ja në pushtet?! Çfarë do ti thotë elektoratit të Shkodrës, po të Shqipërisë, që edhe pse me zgjedhje njëpartiake, nuk arriti të gjejë një drejtues të denjë?!

/MAPO.al

*Dokumentet e policisë italiane që publikoi PD-ja

Foto: Luigj Pjetri

dhe Viktor Doda