Ditën e hënë, një turist zvicerian humbi jetën dhe tre të tjerë u plagosën në shtegun alpin Valbonë-Theth. Presidenti i Federatës Shqiptare e Alpinizmit dhe Turizmit Malor, Artur Guni thotë se se në Shqipëri nuk ka ekip kërkim – shpëtimi.
Më tej, ai tha se guidat duhet të jenë të ndara, duke shtuar se federata shqiptare po diskuton me Ministrinë e Turizmit për licencimin e guidave.
“Në udhërrëfyesit apo guidat ndahen në disa kategori, janë ata që shkojnë deri në 2 mijë metra dhe ata që shkojnë në më shumë se 2 mijë metra. Jemi ne diskutim me Ministrinë e Turizmi për licencimin e guidave. Duhet të ketë një diferencim midis guidave”, tha Guni në Abc Live.
Presidenti i Federatës tha se mungesa e fondeve dhe legjislacioni janë arsyet se pse vetëm një pjesë e vogël e guidave në Shqipëri janë trajnuar.
“Një pjesë e vogël kanë bërë trajnime. Federata jonë nuk i ka bërë këto trajnime, për shkak të mungesës së fondeve dhe legjislacionit”, tha Guni.
Ndër të tjera Guni tha se sezoni aktual turistik është i rrezikshëm për shkak të rrëshqitjes së ortekëve.
