Zona e propozuar për stadiumin e Inter Miami, skuadrës së re, që do t’i bashkohet MLS, me pronar David Beckham, është shumë më toksik sesa pritej më parë, sipas një studimi të fundit. Aty është konstatuar ndotje arsenike më e madhe sesa pritej. Mostrat e ndotura të tokës paraqesin “rrezik fizik” për njerëzit. Ky studim i çështjeve mjedisore, që ka përfshirë edhe vendndodhjen e propozuar të stadiumit, si pjesë e një kompleksi komercial prej 1 miliard dollarësh, i ka ngatërruar jo pak punët.
Klubi dhe administrata lokale e qytetit janë duke negociuar kushtet e një qiraje 99-vjeçare të tokës, ku do të lejohet Inter Miami të ndërtojë kompleksin në fjalë, që do të përfshijë stadiumin 25.000 vendesh, një hotel, zyrë, qendër tregtare dhe fusha stërvitjeje futbolli, pa harruar vendet për parkim. Kjo zonë, në pronësi të qytetit, është e mbushur me ndotje, sipas analizës së klubit. Testet përkatëse kanë zbuluar se nivelet e kontaminimit janë në dyfishin e kufirit të lejueshëm për arsenikun, ndërsa tejkalojnë edhe kufijtë ligjorë të bariumit dhe plumbit.
Zyrtarët e Inter Miami vlerësuan më parë se pastrimi i mbetjeve të tilla toksike do të kushtonte afro 35 milionë dollarë, por drejtuesit e pushtetit vendor thonë se për këtë gjë nevojiten më shumë se 50 milionë dollarë. Inter Miami do të fillojë të luajë në MLS vitin 2020, duke pasur si shtëpi të përkohshme Fort Lauderdale, deri në përfundimin e pritur të stadiumit të vet, më 2022. Klubi i Beckham ka nënshkruar me tre lojtarë, përpara sezonit të tij inaugurues: sulmuesi Julian Carranza, mesfushori Matias Pellegrini dhe mbrojtësi Christian Makoun./telesport.al/
