fbpx

Aktualitet

Vetëvendosje ironi me Ramën e Veliajn: Qeverisni pa opozitë, katastrofë





               Publikuar në : 20:31 - 12/11/19 |
mapo.al

Pas deklaratës së Bashkisë Tiranë lidhur me qëndrimin e Vetëvendosjes për prishjen e ndërtimeve në zonën e “Astirit” dhe komenteve të kryeministrit Edi Rama i cili çeljen e zyrës në Tiranë e cilësoi lajthitje, Qendra e Lëvizjes Vetëvendosje në Shqipëri ka reaguar sërish. Enis Sulstarova, kreu i Bordit të VV, përmes një deklarate ku nuk mungon ironia me Veliajn e Ramën, thotë se “është e habitshme se si mund të të quhet “ndërhyrje në punët e brendshme të qytetit” kur aktivistët dhe drejtuesit e Vetëvendosjes në Tiranë janë në fakt shtetas të Shqipërisë dhe banorë të Tiranës.


Ai thekson gjithashtu se Rama e ka lënë vendin pa opozitë dhe tani po kërkon t’i mbyllë gojën një OJQ-je.“Në Republikën e Shqipërisë ne jemi të regjistruar si organizatë joqeveritare dhe jofitimprurëse, dhe është shenjë katastrofale kur një forcë politike e cila tashmë qeveris pa opozitë institucionale në nivel qendror e lokal, shënjestron dhe përpiqet t’ia mbyllë gojën edhe organizatave joqeveritare që nuk ia ndjekin avazin”, thuhet në deklaratë.



Më poshtë deklarata e plotë:
Si kryetar i Bordit të Qendrës së Lëvizjes VETËVENDOSJE! në Shqipëri, më duhet të shpreh shqetësimin për një deklaratë të sotme nga Bashkia e Tiranës.


Bashkiakët ankohen se Lëvizja “ndërhyri në punët e brendshme të qytetit”. Është e papranueshme kjo shprehje, të ankohesh se pse qytetarët shprehin shqetësim për çështjet e qytetit të tyre. Anëtarët e bordit të Qendrës sonë, si edhe shumica dërrmuese e aktivistëve, janë shtetas të Shqipërisë, pjesa më e madhe votues e banorë të Tiranës. Megjithatë, mendojmë se jemi në të drejtën tonë kur shprehemi për çështjet e Tiranës, siç është kushdo që ia do të mirën kryeqytetit. Por duhet shtruar seriozisht pyetja se a është në të drejtën e vet kryetari i partisë që drejton bashkinë e Tiranës, kur merret vesh me Vuçiçin për “marrëveshje rajonale”, në emër edhe të Kosovës?

Nuk shkon kështu, këta na thonë se shqiptari s’paska të drejtë të flasë për Tiranën, kur po të njëjtët ftojnë serbët të flasin për Kosovën, pa Kosovën.

Qendra e Lëvizjes VETËVENDOSJE! në Tiranë e fton Bashkinë e Tiranës të mos i marrë kritikat si personale, por si institucionale. Në Republikën e Shqipërisë ne jemi të regjistruar si organizatë joqeveritare dhe jofitimprurëse, dhe është shenjë katastrofale kur një forcë politike e cila tashmë qeveris pa opozitë institucionale në nivel qendror e lokal, shënjestron dhe përpiqet t’ia mbyllë gojën edhe organizatave joqeveritare që nuk ia ndjekin avazin.

Lëvizja VETËVENDOSJE! Qendra në Shqipëri për çështjet kombëtare do të kërkojë vazhdimisht bashkëpunimin me faktorët politikë, qofshin ata në qeveri apo opozitë. Njëherazi, do të denoncojmë politikat që i shohim si të gabuara. Ne do të jemi të rreshtuar jo pas ndonjë partie, por pas ideve për zhvillim ekonomik, demokraci qytetare e të drejta njerëzore.

LEXO EDHE:

Bashkia e Erion Veliajt sulmon Lëvizjen Vetëvendosja për Astirin

Vetëvendosja me zyrë në Tiranë, Rama sulmon Albin Kurtin: Lajthitje


Etiketa: , , , ,

Pas