Sheffield United ka surprizuar në shtëpi Arsenalin, duke e mposhtur me shifrat 1-0, fale një goli të Mousset. “The Blades” shfrytëzuan në maksimum avantazhin e minutës së 30-të, duke mos lënë asnjë hapësirë deri në fund.
Sfida nisi më mirë për londinezët, teksa patën një mundësi ideale me anë të Nicolas Pepe, i cili u gjet mjaft mirë në zonë nga Kolasinac, por afrikani, në mënyrë të pabesueshme nuk arriti ta devijonte topin në rrjetë.
Në minutën e 30-të ishte dhe momenti i vendasve. Një përgjumje totale në mbrojtjen e “Topçinjve”, solli edhe golin e avantazhit për Sheffield, me Mousset që shtyu topin në rrjetë pas pasimit të O’Connell.
Në pjesën e dytë të besuarit e Emery provuan me të gjitha forcat, por mbrojtja hermetike e Sheffield United rezistoi deri në fund, duke marrë një fitore të vyer. Kështu, Arsenali mbetet në vendin e pestë me 15 pikë, ndërsa Sheffield ngjitet në kuotën e 12 pikëve në vendin e nëntë.
Etiketa: Arsenal, gola, Premier League, skuadra
