Të paktën një person ka humbur jetën pas një zjarri në spital në Selanik në Greqinë veriore.
Zjarri shpërtheu pak pas orës 9 të mëngjesit ditën e sotme, në repartin Covid në katin e dytë të spitalit Papanikolaou të qytetit port. Aktualisht në spital po merrnin kujdesin shëndetësor rreth 20 pacientë.
Sipas drejtorit të klinikës Diamantis Chloros, “rreziku nuk është shmangur plotësisht”.
“Rreth 20 pacientë janë duke u trajtuar. U përpoqa të dal në korridor, kishte tym të dendur, po hynte në zyrën time. Objekti është i vjetër, ka mbetur që nga viti 1980 pa asnjë përmiresim. Një pacient ndoshta i ka vënë zjarrin, i cili u përhap me shpejtësi. Mjekët dhe infermierët ishin të mbyllur në zyrat e tyre dhe të sëmurët në reparte. Askush nuk mund t’i ndihmojë ata. Të tjerët janë në oborr me oksigjen”, tha ai.
Sipas informacioneve nga spitali, dy pacientë me Covid janë lënduar rëndë dhe janë transportuar në Repartin e Mjekimit Intensiv, ndërsa pjesa tjetër e pacientëve janë nxjerrë nga klinika Covid dhe janë transferuar në repartet e tjera të spitalit.
Zjarrfikësja thotë se zjarri është lokalizuar.