Fitorja në mesjavë e ka kthyer në rrugën e duhur Manchester United. Triumfi 1-0 ndaj Partizanit të Beogradit është pasuar me një trepikësh në kampionat. “Djajtë e kuq” kaluan pa shumë vështirësi 3-1 Norwich City, duke ngjitur kështu shkallët e renditjes.
Dy gola dhe dy penallti të humbura prodhoi 45 minutëshi i parë, me McTominay dhe Rashford që gjetën fundin e rrjetës. Sulmuesi anglez u tregua i saktë në përpjekjen e dytë, pasi humbi fillimisht 11 metërshin dhe më pas sigloi rezultatin e pjesës së parë në 2-0. Pak sekonda para fundit të 45 minutëshit të parë, ishte radha e Martial për të humbur një penallti.
Francezi gaboi në këtë tentativë, por në minutën e 73-të shënjestra e tij u përmirësua duke shënuar për 3-0. Goli i nderit për Norwich mban firmën e Hernandez. Pas kësaj fitoreje, United ngjitet në vendin e 7-të me 13 pikë, ndërsa “kanarinat” qëndrojnë në vendin e 19-të me 7 pikë.
Vetëm barazim 2-2 në duelin tjetër mes Arsenal dhe Crystal Palace. “Topçinjtë” shpërdoruan avantazhin e krijuar në pjesën e parë me dy qendërmbrojtësit, Sokratis e Luiz, duke ndarë një pikë me Palace që qëndron një pikë pas Arsenalit të vendit të 5-të.
