BILD
Sulm mbi një sinagogë në lagjen Paulus në Halle të Gjermanisë. Së paku dy persona u ekzekutuan nga atentatori. Mbi godinë ai hodhi edhe lëndë shpërthyese.
Për orë të të tëra, policia mbajti frymën, forcat speciale mbërritën në ndihmë, stacioni hekurudhor në Halle u bllokua. Edhe 15 kilometra më tutje u dëgjuan krisma. Një fshat u izolua plotësisht.
Rreth mbrëmjes u bë e qartë: sulmi ishte kryer nga një person i vetëm. Neonazisti 27-vjeçar, Stephan B. e transmetonte krimin e tij të tmerrshëm në internet. Pamjet tregonin se si mbërriti para sinagogës, arsenalin e armëve dhe municioneve, si e instaloi eksplozivin dhe si u përpoq të qëllonte për të hapur derën e përparme, por kjo nuk funksionoi.
Videoja tregon edhe vrasjen e një gruaje, e cila po kalonte në skenën e ngjarjes krejt normalisht, por u ekzekutua gjakftohtësisht. Meqenëse autori nuk pati sukses në sinagogë, ai hipi në makinë dhe u ndal në një restorant qebabi. Krejt i akullt, aty vrau një tjetër person. Pasi doli nga restoranti, u kthye sërish dhe qëlloi disa herë mbi kufomën. Aty pati një shkëmbim të shkurtër zjarri me policinë.
Më pas, rreth orës 13:30 u nis drejt një servisi makinash në një fshat pranë. Pasi zbriti nga makina, kërkoi një mjet tjetër. Një nga tre punonjësit i tha se nuk kishin. Vrasësi pa një taksi përpara ofiçinës dhe tha: ‘Ja ku qenka’.
Nisur nga ky dialog, aty mbërriti një person i katërt, një elektricist, që mesa duket punonte aty afër. Ai i tha vrasësit: ‘Nuk do ta marrësh’. Agresori hapi zjarr edhe ndaj tij. Elektricisti u plagos, një helikopter e solli në spital ku ndodhet jashtë rrezikut për jetën.
Neonazisti u arratis më pas me taksi në autostradën A9. Në një kryqëzim ai mori rrugën për në B91. Në Vershen, taksia e tij u përplas me një kamion. Për shkak të këtij aksidenti, ai u arrestua më në fund.
Krimi ndodhi në Yom Kippur (dita e pajtimit), festa më e rëndësishme hebreje, e cila vjen pas një periudhe agjërimi.
“Sipas të dhënave paraprake, mendojmë se është një sulm antisemit,” tha ministri i Brendshëm, Horst Seehofer.
