U futen nga stoli për t’i dhënë tre pikët Legias në një transfertë që u duk se nuk kishte zgjidhje.
Ernest Muçi dhe Lirim Kastrati, dyshja shqiptare e gjigantit polak ishte mbresëlënëse në Moskë, teksa ishin protagonistë në golin e vetëm përballë Spartakut të Moskës.
Sfida e vlefshme për grupin C të UEFA Europa League u zgjidh nga një gol i futbollistit të kombëtares kosovare, por që natyrisht merita ka edhe talenti i kombëtares kuqezi, i dalë nga akademia e Tiranës.
Vetëm 11 minuta në fushë, dhe Muçi shpiku gjithçka për golin e fitores. Pasi fitoi duelin e shpejtësisë me mbrojtësin kundërshtarë, Muçi lëshoi një top në zonë, të cilën e shfrytëzoi maksimalisht Kastrati që tundi rrjetën. Një gol totalisht shqiptarësh, që udhëheqin kështu Legian drejt suksesit edhe në Europë.
