Presidentja e Kosovës, Vjosa Osmani, pas takimit me të dërguarit e posaçëm Lajčák dhe Escobar, është shprehur se “Kosova asnjëherë nuk ka kontribuar në tensione dhe është angazhuar vazhdimisht për paqe dhe stabilitet si dhe për zgjidhje evropiane”.
Vizita e dy zyrtarëve të lartë të BE-së dhe SHBA-së, Miroslav Lajçak dhe Gabriel Escobar, vjen pas tensioneve të ditëve të fundit, në veri të Kosovës.
“Kosova është palë konstruktive, e përgatitur dhe e angazhuar në procesin e dialogut të përqendruar në njohjen e ndërsjellë”.
“Në takimin me të dërguarit e posaçëm Lajčák dhe Escobar shpreha përkushtimin e Kosovës për ta vazhduar bashkëpunimin dhe koordinimin me partnerët tanë, duke potencuar se angazhimi i vendit tonë në dialog është i bazuar në mbrojtjen e sovranitetit, rendit kushtetues dhe integritetit territorial të Kosovës, të cilat janë të paprekshme”, tha Osmani.
“Kosova asnjëherë nuk ka kontribuar në tensione dhe është angazhuar vazhdimisht për paqe dhe stabilitet si dhe për zgjidhje evropiane. Vendi ynë është i ndërtuar mbi parimin e një shoqërie multietnike ku të gjithë kanë të drejta të barabarta, pa dallim etnie”, – theksoi kreu i shtetit të Kosovës.
Pas Prishtinës, Lajčák dhe Escobar do të vizitojnë edhe Beogradin.
