Ajo që të kuqtë i druheshin më shumë, makthi i tyre më i madh, Vllaznia dhe “xhaketat e zeza” i largojnë sërish nga titulli kampion. Të kuqtë kanë “alergji” nga vendi i parë, e lëshojnë sërish, por këtë herë kanë shumë pak kohë në dispozicion, vetëm 90 minuta për të shpresuar në ndonjë mrekulli.
Ekipi i Ilir Dajës dështon sërish të thyejë Vllazninë, jo vetëm që nuk e bëjnë këtë, por në “Air Albania” festa ishte kuqeblu. Shkodranët arrijnë një fitore heroike, një trepikësh që blindon prezencën e tyre në Europë ndërsa shkojnë në javën e fundit me pikë të barabarta me Teutën, 63 dhe me shpresën që Apolonia të bëjë ndonjë mrekulli, por më parë duhet të kalojnë Laçin, ky është i vetmi kombinim që mund t’i dhurojë titullin, sigurisht dhe kombinimi më i vështirë i mundshëm.
Partizani largohet sërish me kokën poshtë, ky ishte një fund i hidhur në një edicion fantastik dhe përtej çdo parashikimi.
Në “Air Albania” u zhvillua një 90-minutësh shumë i bukur për t’u parë, një futboll i hapur, raste për shënim dhe sigurisht nuk mund të mungonte dhe pak moviolë.
Të kuqtë zbritën më mirë në fushë, iu afruan golit të avantazhit që në minutën e katërt por Kardozo shpërdoroi një rast të pastër i vetëm përballë portierit Zogoviç. Vllaznia provoi t’i ngacmojë me goditje standarde, por Alban Hoxha në disa momente mbajti portën e pa prekur.
Në fraksionin e dytë, në momentin më përcaktues të ndeshjes, pas një insistimi të gjatë në zonë, gjyqtari i takimit Ena Jorgji akordi një penallti në favor të Vllaznisë për prekje të topit me dorë në zonë nga Belica, një vendim i marrë pasi u konsultua dhe me asistentin e tij.
Sigurisht ky rast nuk kaloi pa kontestime nga ana e lojtarëve dhe stafit të Partizanit.
Nga 11 metra distancë, Herlad Marku u tregua perfekt në ekzekutim duke kaluar Vllazninë në avantazh, një gol që në fund rezultoi një trepikësh dhe marrje kryesimi të kampionatit me 63 pikë së bashku me Teutën të cilët barazuan 0:0 në fushën e Laçit.
