Kryetarja e Komisionit Parlamentar për Edukimin dhe Mjetet e Komunikimit, Albana Vokshi, i drejtohet me një letër kryeministrit Edi Rama dhe kryetarit të Kuvendit Gramoz Ruçi, ku në emër të Grupit Parlamentar të Partisë Demokratike kërkon që të respektohet Kushtetuta, (pikërisht neni 7) për ndarjen dhe balancimin e pushteteve.
Partia Demokratike kërkon nga kryeministri dhe kreu i Kuvendit, që t’i jepet fund refuzimit të përsëritur nga ministrat e qeverisë, që të japin shpjegime dhe informacione për veprimtarinë e tyre, sa parashikon ligji.
Pas refuzimeve të përsëritura të ministrave për të dhënë shpjegime ka ardhur sërish kjo kërkesë, gjë që është e vetmja mënyrë që opozita të ushtrojë të drejtën e saj Kushtetuese, për kontroll parlamentar.
“Ky refuzim i heq mundësinë e kontrollit kushtetues opozitës, gjë që është goditja më e rëndë e demokracisë në vend dhe përpjekje për të eleminuar opozitën”.
Letra e drejtuar kryeministrit Edi Rama dhe kryetarit të Kuvendit Gramoz Ruçi, i është bërë e ditur edhe krerëve të grupeve Parlamentare si dhe tre selive kryesore diplomatike në vend: SHBA, BE, OSBE.
