Deputetja e Partisë Demokratike, Jorida Tabaku, e pranishme në Roterdam ku mori pjesë në Kongresin e PPE-ve tha se votoi për kryetarin e ri të Partive Popullore Europiane.
“Kënaqësi sot të votoja për Presidentin e EPP Manfred Weber! Jam e sigurtë që me mbështetjen tij, Partia Demokratike do të vazhdojë të jetë pjesë e familjes së EPP!”, theksoi Tabaku.
Manfred Weber një ditë më parë u shpreh i kënaqur që ishte në Roterdam ku dhe po bëheshin përgatitjet e fundit, përpara se të votohej në Kongres për kryetarin e ri. “I lumtur të shoh kaq shumë miq nga gjithë Europa”, tha ai.
Ndonëse e pranishme ka qenë edhe Albana Vokshi, duket se kjo e fundit nuk kishte të drejtë vote. Në Kongresin e partive të djathta Europiane nuk janë ftuar përfaqësuesit e Rithemelimit, në PD.
Kush është Manfred Weber, ai që pritet të zgjidhet në krye të partive të djathta Europiane?
Manfred Weber (lindur më 14 korrik 1972) është një politikan gjerman i cili ka udhëhequr Partitë Popullore Evropiane, në Parlamentin Evropian, që nga viti 2014. Ai ka qenë deputet i Parlamentit Evropian (PE), nga e djathta gjermane që nga viti 2004. Weber është anëtar e Unionit Kristian Social në Bavari (CSU), pjesë e Partive Popullore Evropiane.
Në zgjedhjet e shtetit bavarez të vitit 2003, Weber u bë parlamentari më i ri, në moshën 29-vjeçare. Aktualisht kryeson Grupin e Partisë Popullore Evropiane, ndërsa ishte udhëheqësi më i ri i grupit në Parlament në kohën e emërimit të tij në 2014, si dhe kreu më i ri i grupit të PPE. Weber njihet si një politikan i moderuar dhe ndërmjetësues i pushteteve në politikat e BE-së.
Më 5 shtator 2018, Weber deklaroi synimin e tij për të kandiduar për postin e Presidentit të Komisionit Evropian. Ai shihej si kandidati kryesor për t’u bërë Presidenti i ardhshëm i Komisionit Evropian. Edhe pse u njoftua më 28 maj se Presidenti i ri i Komisionit Evropian do të zgjidhej në një samit të BE-së, në qershor; Weber nuk u nominua. Në vend të tij u zgjodh Ursula von der Leyen. Megjithatë, nga Kongresi që po mbahet sot dhe nesër në Roterdaim, atij pritet t’i besohet një post tjetër i rëndësishëm. /Liberale.al/
