Autorët e vrasjes së Regis Runajt, i cili u ekzekutua pranë varrezave të qytetit të Elbasanit në 29 korrik dhe Emiljano Ramazanit 10 ditë më parë, kanë dalë sot para Gjykatës.
Trupa gjykuese e përbërë nga gjyqtarja Pajtime Fetahu dhe prokurori Kreshnik Ajazi dha masën e sigurisë arrest me burg për dy vrasësit, Xhuljano Hoxha, 29 vjeç dhe Eugen Halili, 23 vjeç.
Sipas policisë, Runaj është vrarë nga dy personat me të cilët ka qenë duke konsumuar lëndë narkotike. Ata më pas kanë ecur në drejtim të varrezave ku e kanë qëlluar viktimën 27 herë me thikë duke i shkaktuar vdekjen e menjëhershme.
Sakaq sipas bluve, dy autorët janë të përfshirë edhe në vrasjen e ndodhur 10 ditë më parë ku u ekzekutua me armë zjarri Emiljano Ramazani, mik me Regis Runajn.
Runaj u godit 27 herë me thikë
Regis Runaj ka qenë me 29-vjeçarin Xhuljano Hoxha dhe Eugen Halilin 23 vjeç duke konsumuar lëndë narkotike. Ata janë ndaluar në park pranë varrezave të qytetit. Në këtë moment, Eugen Halili ka goditur fillimisht me thikë pas shpine Runajn duke e lënë pa ndjenje dhe më pas e ka qëlluar plot 26 herë të tjera. Vetëm 23 vjeç, Regis Runaj ka humbur jetën në vendin e ngjarjes.
Autorët janë zbuluar nga njollat e gjakur të gjetura në motorin e autorëve të cilët kanë rezultuar se i përkisnin Regis Runajt. Gjithashtu policia ka sekuestruar edhe një shumë eurosh dhe prova të tjera ligjore.
Ndërkohë dy ditë më parë, policia zbuloi se autorët kanë hedhur thikën me të cilën kanë kryer krimin në lumin “Shkumbin”.
