Mark Chapman vrasësi i John Lennon, ka kërkuar falje pas 40 vitesh.
Chapman shtiu 4 herë mbi këngëtarin ikonë, në vitin 1980, jashtë apartamentit të tij në Manhattan. Bashkëshortja Ono ishte aty dhe pa gjithçka.
Chapman i ka kërkuar falje sot Onos, për herë të parë, bën të ditur BBC.
Gjatë seancave gjyqësore, ai është shprehur se e vrau rock-starin 40 vjeçar për lavdi, dhe se për këtë e meritonte dënimin me vdekje.
Ai ka shprehur pendesë dhe e mendon shpesh atë që ka bërë, dhe e pranon se do ta kalojë gjithë jetën në burg.
“Dua ta them, se më vjen keq”, është shprehur Chapman, në seancën dëgjimore në gjykatën e New York-ut.
“Nuk kam asnjë shpjegim, e bëra për lavdinë time personale“, ka shtuar ai.
“E vrava vetëm se ishte shumë, shumë i famshëm. Nuk kisha asnjë inat ndaj atij personi, si njeri. Më vjen keq për dhimbjen që i kam shkaktuar Onos, i kërkoj falje”, ka pohuar vrasësi.
Gjykata e ka refuzuar kërkesën për lirim, duke arsyetuar se kjo nuk do të përputhej me mirëqënien e shoqërisë.
Kur vrau Lennon, ai ishte 25 vjeç. Sot është 65.
Chapman është martuar dhe paraqitet tashmë si një katolik i devotshëm. Ai është postier në seksionin e burgut ku vuan dënimin.
