Vrasja e Evanit të vogël, nëna dhe partneri i saj dënohen me burgim të përjetshëm
Burgim i përjetshëm për Letizia Spatola dhe Salvatore Blanco. Ky është vendimi i gjyqtarëve të Gjykatës së Assizes të Sirakuzës për rastin e vogëlushit Evan Lo Piccolo. Letizia Spatola ka qenë e pranishme në sallën e gjyqit kur është dhënë dënimi, ndërsa Blanco ka qenë në një lidhje live nga burgu Vibo Valentia ku po mbahet.
Sipas aktakuzës, rrahja e vazhdueshme nga nëna dhe partneri i saj, dyshohet se ka sjellë vdekjen e vogëlushit Evan, më 17 gusht 2020, i cili ishte vetëm 21 muajsh. Fëmija u shoqërua në spitalin e Modica në gjendje shumë të rëndë. Nëna e tij thirri ambulancën, por ishte tepër vonë. Fëmija me trupin plot të mavijosur ndërroi jetë pak më pas.
Prokurori i Sirakuzës kishte kërkuar burgim të përjetshëm si për Letizia Spatola, ashtu edhe për shokun e saj Salvatore Blanco.
Mbrojtja nga e ëma e fëmijës, se gjithmonë ishte dhunuar nga partneri i saj, sipas magjistratëve nuk do të kishte asnjë bazë. Me pak fjalë, të dy do të kishin, sipas akuzës, përgjegjësinë për vdekjen e Evanit të vogël. Blanco do të kishte vepruar sepse nuk e duronte dot të qarën e foshnjës dhe nëna e Evan do të kishte fshehur gjithçka që ndodhi në shtëpinë e tyre në Rosolini për të shmangur ndërhyrjen e shërbimeve sociale.
Gjykatësja Tiziana Carrubba, i dënoi ata me burgim të përjetshëm për vrasje, me një vit izolim, si dhe me ndalimin e përhershëm nga postet publike dhe heqjen e përgjegjësisë prindërore./
