Vëllai vret me pistoletë vëllanë dhe kunatën, në një ngjarje tragjike që tronditi kryeqytetin pasdites e djeshme. Një ditë pas krimit dhe arrestimit të autorit të dyshuar, Arsen (Hamza) Askurti, policia ka gjetur armën me të cilën 38 vjeçari qëlloi për vdekje të vëllain dhe kunatën e tij. Nga hetimet e deritanishme shkak i ngjarjes duket se është konflikti për biznesin e përbashkët që kanë pasur dy vëllezërit Muskurti.
Ngjarja ndodhi pranë qendrës se Tiranës në një prej rrugicave që lidh ‘Rrugën e Kavajës’ me Rrugën ‘Myslym Shyri’, ku të martën pasdite Arsen Muskurti, 38-vjeç, ka qëlluar më pistoletë drejt vëllait të tij Dritanit, 44 vjeç dhe kunatës, Nora Muskurtit, duke i lënë të dy të vdekur në vend. Krimi ka ndodhur brenda agjencisë turistike, që menaxhohej nga dy viktimat.
Policia bëri me dije se vrasja e dyfishtë dyshohet se ka lidhje me ndarjen konfliktuale të pak vite më parë të dy vëllezërve nga biznesi i krijuar bashkërisht në 2009. Pas këtij viti agjencia i kishte kaluar në pronësi viktimës, Dritan Muskurtit. Kjo ndarje, siç duket si ka pëlqyer autorit, dhe këtu nisi konflikti mes tyre. Ndërkohë, edhe autori kishte në pronësi një dyqan me produkte të ndryshme.
Ngjarja e rëndë ndodhi në një zonë të populluar ku u pa nga shumë dëshmitarë të cilët u morën pyetën nga policia e Tiranës. Autori i dyshuar Arsen Muskurti, nga pamjet filmike shihet teksa futet me qetësi në biznesin e të vëllait dhe pas krimit është larguar me shpejtësi. Ai është arrestuar pas dy orësh nga policia.
Mësohet se Dritan dhe Nora Muskurti janë prindër te tre fëmijëve të mitur, ndërsa autori Arsen Muskurti baba i shtatë fëmijëve rezulton mjaft agresiv në rrjetet sociale kundër vëllait të tij dhe kunatës. Nga policia ai është cilësuar fondamentalist, pasi 13 gusht shkruan në llogarinë e tij në ‘Facebook’ se vëllai i tij Dritani është i mallkuar nga nëna me shpirt, duke paralajmëruar në një farë mënyrë tragjedinë.
