Adiola Lakra u përdor nga Viktor Marku dhe Sebastian Mali për të vrarë Hekuran Billën. Gjithçka nisi në muajin maj të 2019-së kur Sebastian Mali i kërkoi 26-vjeçares që të krijonte lidhje me Hekuran Billën.
Ajo e dinte që ishin në hasmëri, por Mali dhe Marku i thanë se vetëm donin të dinin se çfarë bënte hasmi i tyre. Menjëherë Adiola Lakra fillon kontaktet me Billën. Pas disa komunikimeve ajo afrohet me 40-vjeçarin dhe krijon lidhje me të.
Gjatë kësaj kohe 26-vjeçarja vijonte kontaktet me Hekuran Billën, por edhe me Sebastian Malin, ndërkohë që Viktor Marku përgatiste ekzekutimin. Kur arritën të gjejnë armët, dhe vendi doli nga karantina, ata nisën vënien në zbatim të planit.
Sebastian Mali i kërkoi Adiola Lakrës që mbrëmjen e 11 qershorit të takohej me Hekuran Billën. Pasi ajo komunikon me të, lënë takim tek Komuna e Parisit, aty ku punonte edhe motra e Billës.
Pasi la takimin, 26-vjeçarja lajmëroi Sebastian Malin dhe ky i fundit dajën e tij, Viktor Markun. Të ndihmuar edhe nga një person i tretë, Viktor Marku dhe nipi i tij nisën të ndjekin Hekuran Billën, i cili po vinte nga Durrësi.
Kur u afruan te Komuna e Parisit, Viktor Marku dyshohet se qëlloi me breshëri Billën, teksa nipi i tij Sebastian Mali, po vëzhgonte vrasjen nga larg.
Më pas autorët u larguan drejt Pezës, ku edhe dogjën makinën. Dëshmia e 26-vjeçares nga Berati duket se ka vendosur “pas murit” dy autorët e arrestuar, që tashmë duket se janë zbuluar edhe me prova.
26-vjeçarja ka pranuar se ndihmoi vrasësit, por ka thënë se nuk e dinte që ata do e vrisnin. Vrasja e Hekuran Billës u bë për hakmarrje, pasi 40-vjeçari kishte vrarë në Angli Prel Markun, në vitin 2006-të.
