Aktualitet

Vrasja e ish-policit Xhelal Reçi në Laç/ Kjo është pista e vetme e hetuesve














Bëni LIKE faqen zyrtare në Facebook
               Publikuar në : 12:39 - 03/11/21 |
mapo.al

Ekzekutimi i ish-efektivit të Policisë Xhelal Reçi një ditë më parë në Laç vijon të mbetet pa autor.






Përgjatë 24 orëve, Policia ka shoqëruar dhe marrë në pyetje mbi 20 persona të dyshuar që mund të kenë dijeni rreth krimit, si dhe familjarë e të afërm të viktimës, por dëshmitë e tyre nuk e kanë ndihmuar grupin hetimor për të shkuar në gjurmët e autorëve. Gjithashtu, Forcat Speciale të Policisë së Shtetit kanë ushtruar kontrolle në rreth 21 banesa në zonën e Kurbinit, por pa arritur të gjejnë atentatorët apo armën e krimit.


Pista kryesore e hetimeve është përqendruar te konfliktet e djalit të Xhelal Reçit, Besnikut, të cilit iu bë atentat me armë zjarri në gusht të vitit 2020, por fatmirësisht arriti të shpëtojë pa marrë lëndime. Konfliktet e tij po kalojnë në sitën e hetuesve me qëllim identifikimin e autorëve.







Pavarësisht se vrasja është filmuar nga kamerat e sigurisë të disa bizneseve, identifikimi i autorëve duket mjaft i vështirë, pasi ata kanë qenë me kapele e maska mjekësore anti-Covid. Pamjet e kamerave pritet të dërgohen për ekzaminim të specializuar jashtë vendit, me shpresë se mund të ndihmohet në identifikimin e autorëve.




ATENTATET
Deri më tani pista kryesore e hetimeve mbetet ajo e konflikteve të të birit, për të cilat informacioni është shumë i cunguar. Ende nuk dihet se në çfarë konfliktesh është përfshirë djali i viktimës, i cili më shumë se një vit më parë ishte shënjestër e një atentati nga dy persona të maskuar që qëlluan me armë në drejtim të tij. Dyshohet gjithashtu se rreth tri vite më parë Xhelal Reçi dhe dy djemtë e tij kanë qenë në shënjestër të një tjetër atentati të dështuar.



Lexo edhe :  Del VIDEO/Si u ekzekutuan në atentatin e Astirit Erigers Mihasi dhe shoku i tij

Duke qenë se Besnik Reçi, 36 vjeç, ruhej vazhdimisht, atentatorët kanë zgjedhur për të goditur babanë e tij, i cili mbeti i vrarë mëngjesin e së hënës fare pranë dyqanit që familja zotëron në qytetin e Laçit. Por këto nuk janë dy atentatet e vetme ndaj familjes Reçi, edhe rreth 13 vite më parë Besniku është përfshirë në një konflikt me armë zjarri në fshatin Gjormë të Krujës, duke arritur të shpëtojë.

NGJARJA
Ish-efektivi i Policisë së Shtetit u ekzekutua me armë zjarri mëngjesin e së hënës në qytetin e Laçit, teksa po hapte dyqanin e tij. Jo zyrtarisht thuhet se viktima shoqërohej nga bashkëshortja, e cila kishte zbritur më përpara nga automjeti tip “Benz” që ata kanë në pronësi.

Të paktën tre persona kanë marrë pjesë në atentat ndaj 61-vjeçarit, dy prej të cilëve të armatosur me armë zjarri të llojit pistoletë, ndërsa i treti luante rolin e shoferit të mjetit me të cilin ata u larguan nga vendi i ngjarjes dhe e dogjën afër lumit të Kurbinit. Autorët kanë ndjekur lëvizjet e viktimës kohët e fundit dhe vunë në punë planin e tyre për ta ekzekutuar mëngjesin e së hënës në mes të qytetit të Laçit.

Xhelal Reçi mori një plumb në gjoks dhe me reflekset e ish-policit ka tentuar t’i shpëtojë sulmit duke hyrë në një rrugicë mes dy ndërtesave në zonë. Por plaga që kishte marrë ishte vdekjeprurëse dhe ai humbi menjëherë jetën.

Ekzekutimi i 61-vjeçarit ka qenë i mirorganizuar dhe ngjason me atentate të tjera të kryera në vend. Nga pamjet e kamerave të sigurisë është zbardhur edhe dinamika e plotë e atentatit, por jo autorët. Sipas pamjeve të zbërthyera nga hetuesit, vetëm njëri prej atentatorëve ka qëlluar në drejtim të viktimës, ndërsa tjetri gjithashtu i armatosur e shoqëronte atë.

1


Etiketa: , ,

CLOSE
CLOSE
Pas