Ish-kryeministri Sali Berisha akuzon Gazment Bardhin dhe Taulant Ballën si përgjegjësit kryesorë të vrasjes së Pjerin Xhuvanit gjatë fushatës elektorale të zgjedhjeve të 25 prillit vitin e kaluar.
Në një konferencë shtypi me gazetarët, Berisha akuzoi Bashën se komisioni hetimor parlamentar që u ngrit për zgjedhjet, u mbyll kur u kërkua hetimi i kësaj dosje.
“Akoma më e turpshme, më i paimagjinueshme, është shuarja e komisionit të hetimit të zgjedhjeve. U krijua komisioni në fund të tetorit, parlamentar, nuk ka ndodhur kurrë. A e dini ju kur u shua? Kur u kërkua që në axhendë të hetohet Elbasani, gjëja më normale. Ti e ke kundërshtar atë, por ato që janë, janë. Aty u derdh gjak, u vra një njeri. Aty u gropos komisioni me urdhër të Bashës dhe ç’është e vërteta direkt përgjegjësi ka Gaz Bardhi dhe Taulant Balla, se ndodhi një vrasje aty, i cili ishte një militant i majtë po s’ishte kurrë për t’u vrarë. Askush s’duhet të vritet në Shqipëri. Dhe morën prokurorin që është një lloj Blerina Muçi në katror ose bis, këtë prokuror që gënjeu shqiptarët se nuk kishte materiale zgjedhore në makinën e militantit të Taulant Ballës, dhe që ato u gjetën. Këtë e prunë prokuror në SPAK. Dhe ra paqja midis tyre. Prandaj nuk ka ai asnjë tagër të flasë për këto gjëra”, u shpreh Sali Berisha.
Pjerin Xhuvani mbeti i vrarë gjatë një përplasje me armë vitin e kaluar pak ditë përpara zgjedhjeve parlamentare, teksa Strukturat e Mbrojtjes së Votës të ngritura nga PD-ja e Elbasanit morën njoftim se grupe të socialistëve po blinin vota të qytetarëve.
Taulant Balla ishte drejtues i PS për qarkun e Elbasanit, kurse Gazment Bardhi drejtues i PD në këtë qark.
