Tirana u trondit sot nga një vrasje në zonën më të frekuentuar të kryeqytetit, pranë ish-Ekspozitës. Jo shumë larg nga Gjykata e Tiranës, Mexhit Picari vrau ish-dhëndrin e tij, Kudret Salija, pasi ky i fundit po divorcohej me të bijën e tij.
Si pasojë e të shtënave me armë, një plumb ka depërtuar edhe në redaksinë e portalit Dosja.al që ndodhet shumë pranë vendit të ngjarjes.
Kryeredaktorja e portalit Fjola Graçi në një intervistë u shpreh se kishte qenë e para që kishte konstatuar se po qëllohej me plumba dhe se menjëherë pas kësaj kishin njoftuar policinë.
Ajo shtoi se në fillim menduan se do të kishte qenë një konflikt mes disa personave ndërsa më pas kishin kuptuar se kishte qenë një konflikt familjar personal.
“Isha unë e para që e pashë sesi çfarë kishte ndodhur. Të gjithë u shtrimë përtokë, kaluan disa minuta dhe kuptuam që kishte ndodhur një vrasje, më pas njoftuam policinë. Për ne është një gjë shumë e rëndë. Drejtori ka qenë në kafe, nëse do kishte qenë i ulur në zyrë nuk do kishte shpëtuar dot pa u qëlluar nga plumbi. U kuptua që ishte armë pasi bëri dritë. Në fillim menduam se ishte konflikt mes disa personave, por më pas kuptuam që ishte një konflikt personal”- tha ajo për Faxnews.
Çfarë ndodhi sot te ish-ekspozita?
Kudret Salija u qëllua sot nga ish-vjehrri i tij Mexhit Picari, pas konflikteve se viktima i keqtrajtonte vajzën. Çifti mësohet se ishin në prag divorci dhe pikërisht sot kishin seancën e pestë, ku pritej të lexohej akti se kush do t’i mbante fëmijët, ku gjykata do pyeste djalin e madh të çiftit se me kë dëshironte që të rrinte. Mësohet se në tavolinë me viktimën në momentin e krimit ishte edhe i biri dhe një punonjëse sociale. Nga atentati ka mbetur i plagosur edhe ish prokurori dhe njëkohësisht avokati i viktimës Adrian Cama.