Kronika

Atentatet e ditëve të fundit, Lleshaj: Nuk shembet Shqipëria, as siguria, për një ngjarje, as për dy








Bëni LIKE faqen zyrtare në Facebook
               Publikuar në : 14:17 - 18/09/20 |
mapo.al

Ministri i Brendshëm, Sandër Lleshaj ndodhej sot në Gjirokastër nga ku iu përgjigj edhe interesimit të gazetarëve mbi ngjarjet e fundit kriminale, vrasje mafioze dhe atentate me tritol.


Ai ftoi gazetarët në radhë të parë, por edhe qytetarët të mos panikosen nga ajo që ndodhi këtë javë, ku krimi goditi në Tiranë e Elbasan, pasi sipas ministrit Shqipëria nuk shembet, as për një dhe as për dy ngjarje.


“Nuk shembet Shqipëria, as siguria, për një ngjarje, as për dy. Por ju them që gjithsesi, numri i veprave të rënda kriminale në Shqipëri është ky që është. Jemi më pak, krahasuar me të njëjtën periudhë të vitit të kaluar, jemi shumë më poshtë, jemi shumë më poshtë sesa çdo periudhë e ngjashme e historisë sonë. Kaq është. Kjo është e provueshme”, u shpreh Lleshaj.


Sipas ministrit, vrasjet në vend janë të shumta por ato nuk mund të bëhen zero përderisa këtu vazhdojnë të jetojnë njerëz.


“Rendi është në parametra optimal. Ngjarjet janë të rënda, të papranueshme dhe po punohet fort për zbardhjen e tyre sa më shpejt. Duke patur parasysh që Policia shqiptare ka një nivel shumë të lartë të zbulueshmërisë së ngjarjeve kriminale, që shkon në 90% në shumicën e rasteve. Sidomos në krimet e rënda, kalon 90%, jep arsye të plotë se zbardhja e tyre do të bëhet pa hezitim dhe në thellësinë e tyre”, tha Lleshaj.


Prononcimi i Lleshajt pëpara gazetarëve

Zoti Lleshaj dy ditë më përpara SHÇBA-ja në Gjirokastër ka asgjësuar 1000 bimë narkotike. Ku ka qenë Drejtoria Vendore e Policisë së Gjirokastrës lidhur me zbulimin e parcelave? Madje janë pezulluar edhe punonjës policie…
Sigurisht që SHÇBA-ja punon vetëm, punon edhe bashkë me strukturat e policisë. SHÇBA-ja ndërhyn dhe duhet të keni parasysh që një ndër masat dhe mënyrat e ndjekura nga ne, për ta goditur fenomenin, ka qenë edhe goditja e personave të padenjë brenda policisë. Dhe kur angazhohet SHÇBA-ja sigurisht që synohet që edhe të identifikohen punonjës që nuk kanë kryer detyrën me veprime, apo siç ndodh shpesh me mosveprime, dhe mosangazhim në raste të shkëputura. Por gjithsesi janë raste të shkëputura që provojnë seriozitetin tonë që provojnë që ne i përdorim të gjithë instrumentet për ta luftuar këtë fenomen. Sepse ky fenomen ka qenë një mallkim për vendin tonë që ka prodhuar krim, dhe po nuk e çrrënjosëm thellë ne nuk kemi bërë punën. Por ne jemi të angazhuar për ta bërë thellë këtë punë.

Sekretari i Përgjithshëm i Ministrisë së Brendshme ditën e sotme ka dhënë dorëheqjen. A është e vërtetë që ka një javë dorëheqja në zyrën tuaj dhe ju nuk e keni firmosur dhe a ka lidhje me tenderat e uniformave blu?
Së pari, nuk ka një dorëheqje të Sekretarit të Përgjithshëm, ka një lëvizje të Sekretarit të Përgjithshëm në një detyrë tjetër. Ju e dini që administrata publike funksionon si e tërë dhe në kuadër të menaxhimit të kësaj administrate publike bëhen lëvizje, të cilat janë krejt të natyrshme në një strukturë të tillë.Histori me tenderat nuk ka.

Sekretari i Përgjithshëm nuk është marrë me tenderat, nuk merret me tenderat, se tenderat kanë një agjenci të specializuar, e cila i kryen ato dhe i nënshtrohen një procesi të veçantë auditimi, verifikimi, hetimi, kur kanë nevojë për t’u hetuar. Por dua t’ju them që gjithçka është në nivelet optimale.
Ministria e Brendshme është sot në ditën më të angazhuara të punës së saj për të menaxhuar rendin, sigurinë dhe fusha të tjera të përgjegjësisë.

Z. Ministër, këto ditët e fundit kemi dëgjuar shumë vrasje. A është normale për një vend si Shqipëria?
Keni dëgjuar shumë vrasje këto ditë. Madje këto ditë kanë ndodhur pothuajse 10% e vrasjeve që kanë ndodhur gjithë vitin në Shqipëri. Kjo është diçka e cila për fat të keq, për sa kohë kemi njerëz, edhe ndodh që mund të kesh 2-3 ditë që ke një përqendrim të veprave kriminale dhe pastaj ke 2-3 muaj që s’ke asnjë vepër kriminale. Kjo nuk na bën neve të humbasim toruan dhe të biem në panik.

Unë ju ftoj që ta kundroni, të shihni ftohtë situatën e rendit dhe sigurisë dhe mos të biem në panik nga një ngjarje që të themi u shemb! Nuk shembet Shqipëria, as siguria, për një ngjarje, as për dy. Por ju them që gjithsesi, numri i veprave të rënda kriminale në Shqipëri është ky që është. Jemi më pak, krahasuar me të njëjtën periudhë të vitit të kaluar, jemi shumë më poshtë, jemi shumë më poshtë sesa çdo periudhë e ngjashme e historisë sonë. Kaq është. Kjo është e provueshme.

Ne sot kemi rreth 35 vrasje deri tani. S’kemi pasur kurrë ndonjëherë në historinë e re të Shqipërisë, kaq. A janë shumë? Sigurisht që janë shumë. Duhet të jenë zero. Por zero nuk bëhen kurrë këto, për sa kohë ka njerëz në botë. Dhe këtë mund ta krahasoni dhe me shifrat më të mira të vendeve të tjera perëndimore. Kemi shumë vende europiane që kanë më shumë vrasje për frymë sesa Shqipëria. Vende europiane, jo vende të rajonit! Ndaj unë e ftoj edhe median, publikun dhe shoqërinë që të mundohemi të mos krijojmë situata histerie dhe paniku dhe tjetra, të distancohemi pak nga krimi. Distancim nga krimi unë nënkuptoj mbështetjen e policisë. Se nganjëherë i turremi policisë a thua se Policia i bën vrasjet! Jo, Policia është për t’i parandaluar dhe për të gjetur e vënë para përgjegjësisë autorët e tyre.

Kështu që nuk mundet dhe këtë e kam shqetësim për ata që arrijnë ta ndiejnë shqetësimin njëlloj si unë. Ka të tjerë që s’duan ta ndiejnë, mos ta ndiejnë. Por për ata që arrijnë ta ndiejnë përgjegjësinë për këtë vend, seriozisht duhet që në këto momente policia të inkurajohet për të bërë detyrën, sepse s’duhet të harrojmë që policët janë njerëz. Që edhe ata mund të zhgënjehen një ditë, që edhe ata mund të demotivohen, edhe do ta bëjnë punën më keq. Ne kemi interes që policët ta bëjnë punën më mirë dhe që ta bëjnë punën më mirë ata kanë nevojë për mbështetjen tonë, të medias në radhë të parë, të qytetarëve në radhë të dytë, dhe sigurisht ne e kemi detyrë funksionale dhe s’bëhet fjalë për mbështetjen tonë.


Etiketa: ,

Pas