Autori i dyshuar i vrasjes së 35-vjeçarit Altin Balliu është dorëzuar në policinë e Korçës. Olger Mustafa, mbrëmjen e 17 Janarit 2019, qëlloi ndaj Balliut pas një sherri banal për parkimin e makinës.
35-vjeçari ishte në një lokal në lagjen nr.10 të qytetit bashkë me shokët e tij. Ata kishin parkuar keq makinën, duke i bllokuar rrugën Mustafës. Ky i fundit pas sherrit me të rinjtë ka shkuar në shtëpi dhe ka marrë pistoletën. Kur është kthyer në lokal ka gjetur vetëm Balliun dhe ka qëlluar mbi të duke e lënë të vdekur.
Dëshmitarët kanë treguar se 35-vjeçari po i drejtohej makinës ku ndodheshin shokët e tij, kur u qëllua disa here, ndërsa dy prej plumbave e prekën në kokë e trup.
Autori i dyshuar i ngjarjes, Olger Mustafa ka qenë i dënuar më parë për plagosjen e një personi. 34-vjeçari ka qenë i dënuar me 12 vite burg pasi në prill të 2010-ës tentoi të vriste bashkëmoshatarin e tij, Majkëll Hysolli.
“Report TV” sqaron se Mustafa tentoi asokohe të vrasë Hysollin për larje hesapesh dhe u dënua më 30.11.2017 me 12 vite burg por për sjellje të mirë ka bërë vetëm 7 vite. Dënimi është ulur edhe prej gjendjes së keqe shëndetësore me 1 vit e 9 muaj pasi Mustafa është operuar dy herë.
Por, Olger Mustafa ka një dosje më voluminoze pasi është kapur disa herë me lëndë narkotike dhe armë pa leje. Ai gjithashtu ka qenë shkaktar i një aksidenti në fshatin Lumalas.
*Në foto, majtas (me kapele) autori, djathtas viktima
