Gjykata e Tiranës ka lënë në burg Olger Dhimitrin, i cili mesditën e së shtunës qëlloi disa herë me thikë fqinjin e tij, 60-vjeçarin Ilir Kapo, duke e lënë pajetë.
“Nuk mbaj mend asgjë, më vjen shumë keq për atë që ka ndodhur, jam i ofenduar”, janë këto fjalët e 37-vjeçarit Olger Dhimitr në seancën e sotme në gjykatë.
Ngjarja u regjistrua të shtunën pranë shkollës “Harry Fultz” në Tiranë. Autori dhe viktima kishin njohje të mëparshme dhe jetonin në të njëjtën lagje.
Viktima dhe autori ishin brenda në lokal duke konsumuar alkool. Zanafilla e kësaj ngjarje ka filluar me ofendime më pas ka degraduar në sherr verbal mes njëri-tjetrit.
Në këtë moment autori ka kërkuar që të dilnin nga ambientet e lokalit për t’u sqaruar jashtë, sherr i cili degradoi deri në përplasje fizike duke bërë që i riu të nxirrte thikën e të sulmonte për vdekje Kapon.
Olger Dhimitri, fillimisht nuk ka qenë në gjendje që të japë dëshminë e tij për shkak të efektit të alkoolit. Ai është mbajtur i izoluar në komisariat deri në momentin që i ka dalë pija.
