Katër vepra krijuese të ish gazetarit të shërbimit shqip, të Zërit të Amerikës, Xhevat Kallajxhi janë paraqitur për herë të parë në biblotekën e qytetit të tij të lindjes, Gjirokastër.
Veprat janë dhuruar për lexuesit nga familjarët thotë për Zërin e Amerikës, Drejtoresha e Biblotekës Arminda Mevlani dhe po paraqiten në kuadër të aktiviteteve për festën e Pavarësisë së Shqipërisë.
Mes veprave është edhe romani “Larg atdheut” , të cilin autori e la dorëshkrim dhe këto ditë ka parë dritën e botimit.
Xhevat Kallajxhi gati gjysmën e jetës e kaloi në Gjirokastër duke drejtuar nga vitet 1925 deri në 1939 gazetën “Demokratia” ndërsa më pas Xhevat Kallajxhiu emigroi në Shtetet e Bashkuara të Amerikës.
Ai punoi për shumë vite pranë shërbimit shqip të “Zërit të Amerikës” dhe ishte redaktor përgjegjës dhe kryeredaktor i organit të Organizatës panshqiptare “Vatra”, gazetës “Dielli”./VOA
