Ambasadorja Amerikane në Tiranë, Yuri Kim, ka reaguar sërish në lidhje me kandidimin e Tom Doshit, në zgjedhjet parlamentare të 25 prillit.
Kim thotë se ka pasur një bisedë me kryeministrin Edi Rama i cili shton ajo i ka thënë se e ka përjashtuar atë nga PS si dhe e ka garantuar se Tom Doshi nuk do të ketë rol në qeveri.
“Më lejoni t’i jap fund spekulimeve: KM Edi Rama dhe unë patën një bisedë të qartë se çfarë do të thotë ky emërtim. Në fakt, Kryeministri më kujtoi se ai e kishte përjashtuar personalisht këtë person nga Partia Socialiste. Ai theksoi se ky person nuk do të ketë asnjë rol në asnjë qeveri në çdo qeveri që ai do të formojë”, shkruan Yuri Kim.
Postimi i Yuri Kim
Let me end the speculation: PM @ediramaal & I have a clear understanding of what this designation means. In fact, the PM reminded me that he had personally expelled this person from the Socialist Party. He emphasized that this person would have no role in any government he forms. https://t.co/KmfEECp0Gv
— Ambassador Yuri Kim (@USAmbAlbania) February 11, 2021
Një ditë më parë, Tom Doshi, kryetar i PSD, dorëzoi në KQZ kërkesën për regjistrim, për të kandiduar në zgjedhjet e 25 prillit, pavarësisht nga thirrjet e ambasadores amerikane.
Yuri Kim publikoi edhe deklaratën e Departamentit Amerikan të Shtetit që e shpalli Tom Doshin non grata në SHBA, për korrupsion madhor.
Në prill 2018 Shtetet e Bashkuara i ndaluan hyrjen në SHBA Tom Doshit dhe familjarëve të tij.
Në vendimin e DASH thuhet se, “Në bazë të ligjeve amerikane, kur Sekretari i Shtetit, ka informacione të besueshme se një zyrtar i huaj është përfshirë në raste madhore korrupsioni, ose shkelje të të drejtave të njeriut, atij dhe familjes së tij të ngushtë i ndalohet hyrja në Amerikë. Sekretari i Shtetit mund t’ia bëjë njoftimin zyrtarit privatisht ose në publik. Në bazë të njoftimit të sotëm, deputeti Doshi, bashkëshortja e tij Xhovana Doshi, vajza e madhe Briana Doshi, djali në moshë madhore James Doshi dhe fëmijët në moshë të mitur nuk lejohen të hyjnë në Amerikë”.
Në zgjedhjet parlamentare të 2017-ës, Tom Doshi kandidoi në Qarkun e Shkodrës me logon e ish-partisë së Skënder Gjinushit.
