Përveç Redjan Rrrajës, në atentatin ndaj prokurorit Ndoja dhe Landi Muharremit në Durrës, morën pjesë edhe dy persona të tjerë. Gazeta Mapo mëson se prokuroria ka në dorë emrat e këtyre dy personazheve, por mbahen sekretë për shkak të hetimit.
Këta persona dyshohet se janë larguar jashtë shtetit pas atentatit dhe mendohet se kanë qenë vrasës me pagesë. Burime nga grupi hetimor thonë se kemi të bëjmë me dy personazhe të botës së krimit.
Ndërkohë dje u arrestua Arjol Halilaj, si personi që dyshohet se ka ndihmuar autorët ngjarjes ku mbeti i plagosur Arjan Ndoja, Landi Muharremi dhe vdiq shoferi i prokurorit, Andi Maloku.
I riu konsiderohet si bashkëpunëtori kryesor të autorëve të ngjarjes, pasi largoi me mjetin e tij autorët e krimit pasi ata lanë makinën e përdorur gjatë atentatit.
Policia gjeti të dhëna të vlefshme në makinën e braktisur prej autorëve, ndërsa Halilaj u zbulua përmes telefonit të Redjan Rrajës.
Sot në qeli për këtë ngjarje është Redjan Rraja, i cili mendohet se ka qenë në makinë bashkë me dy vrasës të tjerë, kur u qëllua mbi makinën me të cilën udhëtonte prokurori Ndoja.
