Sot pasdite rrjeti social ziente nga lajmi i emërimit të z.Besart Kadia, zv-Ministër i Financave, sidomos duke patur parasysh se ai ishte një vit më parë zyrtar i lartë në PD, Sekretar për Sipërmarrjen, anëtar kryesie dhe anëtar i Këshillit Kombëtar.
Mirëpo, gazeta Mapo ka mësuar se ai është shkarkuar nga funksionet në PDSH, që më datë 5 Nëntor 2019. Dhe arsyeja është se ai ishte nismëtar i krijimit të lëvizjes politike “Alternativa”.
Sipas vendimit të Bashës, që është në këtë shkresë, kjo parti ishte e financuar sipas informacioneve të verifikuara, nga burime të dyshimta financiare të klientëve preferencialë të Qeverisë.
Që nga ajo datë z.Kadia nuk ka asnjë funksion në PD dhe nuk mund të ketë as në të ardhmen. Atij i është hequr e drejta për të zgjedhur dhe për t’u zgjedhur në strukturat e Partisë Demokratike, për shkelje të parimeve bazë të funksionimit të PDSH, të sanksionuar në nenin 9 të Statutit të PDSH-së.