Ditën e sotme pritet të zhvillohen zgjedhjet për kryetarin e Akademisë së Shkencave. 44 akademikë pritet t’i drejtohen kutisë së votimit për të zgjedhur kryesinë dhe këshillin ekzekutiv të Akademisë së Shkencave.
Procesi i votimit do të jetë i fshehtë, ndërkohë që për ata akademikë, të cilët nuk mund të marrin pjesë në procesin e votimit, mund të votojnë përmes postës. Mendohet se procesin zgjedhor do ta udhëheqë akademiku më i vjetër.
I vetmi kandidat për pozicionin e kryetarit të Akademisë së Shkencave, është Akademiku Skënder Gjinushi. Ndërsa, lidhur me kandidimin e Gjinushit, ka reaguar më herët edhe akademiku Artan Fuga, i cili thotë se këto zgjedhje janë të paligjshme.
